মৰিগাঁৱৰ ৰাজপথতে জ্বলিল কাপোৰ ভৰ্তি ট্ৰাক

ডিজিটেল সংবাদ মৰিগাওঁঃ আজি সন্ধিয়া মৰিগাঁৱৰ ৰাজপথত এখন ট্ৰাকত ভয়ংকৰ অগ্নিকাণ্ড সংঘটিত হয়। মৰিগাওঁ জিলাৰ ধৰমতুল আৰক্ষী থানাৰ ঠেকেৰাগুৰিৰ ৩৭ নং ৰাষ্ট্ৰীয় ঘাইপথত সংঘটিত হয় এই অগ্নিকাণ্ডৰ ঘটনা। 

জানিব পৰা মতে অগ্নিকাণ্ড সংঘটিত হোৱা ট্ৰাকখনত কাপোৰ কঢ়িয়াই অনা হৈছিল। ট্ৰাকখন গুৱাহাটীৰ পৰা ডিমাপুৰ অভিমুখে গৈ আছিল। 

ট্ৰাকখনে ডিমাপুৰ দিশে যাত্ৰা কৰি থকাৰ সময়তে এটা চকা ফুটি যোৱাৰ পাছতে এই অগ্নিকাণ্ড সংঘটিত হোৱাৰ সন্দেহ কৰা হৈছে। অগ্নিকাণ্ড সংঘটিত হোৱাৰ লগে লগে পথটোৰ দুয়ো দিশে যান-বাহনসমূহ আৱদ্ধ হৈ পৰে। 

পাছত অগ্নি নিৰ্বাপক বাহিনীৰ বাহনে জুই নিৰ্বাপিত কৰে যদিও ট্ৰাকখন আৰু ট্ৰাকখনত কঢ়িয়াই নিয়া সকলো কাপোৰ জ্বলি ছায় হৈছে । অগ্নিকাণ্ড সংঘটিত হোৱা ট্ৰাকখনৰ নম্বৰ এন এল ০৭ এ এ ১১৫৮।