![ধিঙৰ বান বিধ্বস্ত অঞ্চল পৰিদৰ্শন বিধায়ক অখিল গগৈৰ...](http://media.assettype.com/asomiyapratidin%2F2024-07%2Fb87ff8e4-918f-4edc-911d-7464ff0eef51%2F8.jpg?w=480&auto=format%2Ccompress&fit=max)
ডিজিটেল সংবাদ, বটদ্ৰৱা: শিৱসাগৰ সমষ্টিৰ বিধায়ক তথা ৰাইজৰ দলৰ সভাপতি অখিল গগৈয়ে বৃহস্পতিবাৰে ধিং সমষ্টিৰ জেঙনী, কলাডুবা, জাৰামাৰী, ছুইচ গেইট, ডুমডুমীয়া আদি কেইবাটাও বানাক্ৰান্ত অঞ্চল পৰিদৰ্শন কৰে। নগাঁও জিলাৰ ধিং সমষ্টিৰ অন্তৰ্গত এই চৰ চাপৰি অঞ্চলৰ বানত ক্ষতিগ্ৰস্ত লোকসকলক সাক্ষাৎ কৰি, বানত ক্ষতিগ্ৰস্ত কৃষকসকলক চৰকাৰক ক্ষতিপূৰণ দিয়াৰ দাবী তোলে।
ইফালে বিগত ২২ জুনত লাওখোৱা অভয়াৰণ্যৰ ৰৌমাৰী বিলত মাছ ধৰিবলৈ যোৱা জলিল উদ্দিন আৰু ছমিৰ উদ্দিন নামৰ দুই ভাই ককায়েকক ভুৱা এনকাউন্টৰ কৰা বন বিভাগকো কঠোৰ সমালোচনা কৰে অখিল গগৈয়ে। ইফালে লাওখোৱা অভয়াৰণ্যৰ পৰা ওলাই অহা এটা বাঘে ধিঙত বিগত দহ দিনে আতংকৰ সৃষ্টি কৰা পাছটো বাঘটোক এই পৰ্যন্ত কৰায়ত্ব কৰিবলৈ সক্ষম নোহোৱাটো লজ্জাজনক আখ্যা দিয়ে।
বন বিভাগে ৰাইজৰ পৰা চান্দা বৰঙণি তুলি ছাগলী ক্ৰয় কৰি বাঘ ধৰিবলৈ লোৱা কাণ্ডকো সমালোচনা বিধায়ক গগৈৰ। বনবিভাগে মানুহক হত্যা কৰিব পাৰে যদিও কেবাজনো লোকক আঘাত কৰা এটা বাঘ বনাঞ্চললৈ খেদি পঠিয়াব নোৱাৰাত বনবিভাগৰ বিৰুদ্ধে ক্ষোভ উজাৰে অখিল গগৈয়ে। লগতে চৰকাৰক সমালোচনা কৰি APSCৰ দৰে তৃতীয় আৰু চতুৰ্থ বৰ্গৰ চাকৰিৰ পৰীক্ষা অনুষ্ঠিত কৰিবলৈ লোৱা মুখ্যমন্ত্ৰীৰ এক পক্ষীয় সিদ্ধান্তকো সমালোচনা কৰে বিধায়ক অখিল গগৈয়ে।
আনহাতে আগন্তুক বিধানসভা নির্বাচনত কংগ্রেছৰ লগত একেলগে নিৰ্বাচন খেলাৰ কথা পুনৰ দোহাৰিলে অখিল গগৈয়ে। সাম্প্ৰদায়িক বিজেপি আৰু এ আই ইউ ডি এফক পৰাস্ত কৰাই আমাৰ লক্ষ্য বুলি সাংবাদিকক প্ৰকাশ কৰে। বিধায়কগৰাকীয়ে ৰাইজৰ দলৰ মুখপাত্ৰ মেহেবুব মুক্তাৰক লগতলৈ ডুমডুমীয়া শ্লুইছ গেইটৰ পৰা নাৱত উঠি বানাক্ৰান্ত চৰাঞ্চল পৰিদৰ্শন কৰি অঞ্চলটোত উৎপাদিত মাকৈ, মৰাপাট আদি খেতিৰ খেতিয়কৰ বিস্তৰ ক্ষতি হোৱাৰ পৰিপ্ৰেক্ষিতত চৰকাৰক খেতিয়কক ক্ষতি পূৰণ দিবলৈ দাবী কৰে।