একাংশ ঘৰুৱা শিক্ষকৰ পৰা সাৱধান, আপুনিও বলি হ'ব পাৰে প্ৰৱঞ্চনাৰ...

ডিজিটেল সংবাদ, নগাঁওঃ সন্তানৰ বাবে ঘৰুৱা শিক্ষক নিয়োগ কৰোতে অধিক সচেতন হওঁক । কিয়নো সম্প্ৰতি সকলতে ভৰি পৰিছে প্ৰৱঞ্চকে । বিভিন্ন বেশেৰে আহি আপোনাক প্ৰৱঞ্চকে পেলাব পাৰে জাল । শিক্ষকতাৰ দৰে পবিত্ৰ বৃত্তিত জড়িত লোকেও পেলাইছে প্ৰৱঞ্চনাৰ জাল । শেহতীয়াকৈ তেনে এক ঘটনাই সংঘটিত হৈছে নগাঁৱত ।

মহিলাৰ গোটত ঋণ দিয়াৰ প্ৰতিশ্ৰুতি দি লক্ষ লক্ষ টকা প্ৰৱঞ্চনাৰে লুটি নিয়াৰ লগতে এগৰাকী মহিলাৰ পৰা সোণৰ গহনা পৰ্যন্ত প্ৰৱঞ্চনাৰে লুটি নিয়া অভিযোগত এজন লোক আৰক্ষীৰ জালত পৰিছে।

আৰক্ষীয়ে কঠীয়াতলী লাচিত নগৰত ঘৰুৱা শিক্ষক হিচাপে পৰিচয় দি প্ৰৱঞ্চনাৰ জাল পেলোৱা অশ্বিনী মণ্ডল ওৰফে ৰিতুক মঙলবাৰে নগাঁৱৰ পৰা আটক কৰে। আটকাধীন ঘৰুৱা শিক্ষক হিচাপে প্ৰৱঞ্চনাৰ জাল পেলাই প্ৰায় পোন্ধৰ লাখ টকাৰ লগতে সোণৰ আ-অলংকাৰ লুট কৰি লৈ যায়।

কঠীয়াতলী আৰক্ষী পহৰা চকীৰ অন্তৰ্গত কঠালগুৰীৰ অশ্বিনী মণ্ডল ওৰফে ৰিতুৱে কঠীয়াতলী লাচিত নগৰৰ একাংশ লোকৰ ঘৰত এজন ঘৰুৱা শিক্ষক হিচাপে নিয়োজিত হৈ আহিছিল । পিছত অশ্বিনী মণ্ডলে অতি চতুৰালিৰে এই পৰিয়ালসমূহৰ সৈতে আত্মীয়তা গঢ়ি তুলিছিল।

এজন ব্যৱসায়ী বুলি চিনাকি দি অশ্বিনী মণ্ডলে বহু মহিলাৰ পৰা ব্যৱসায়ত খটুৱাবৰ বাবে ধন ধাৰে লৈছিল । কৌশলৰে কাৰোবাৰ পৰা লৈছে যদি ৪০ হাজাৰ টকা, কাৰোবাৰ ৭০ পৰা ৮০ হাজাৰ টকা আৰু কাৰোবাৰ পৰা লাখ টকা পৰ্যন্ত ধন ধাৰে লোৱাৰ অভিয়োগ উত্থাপন হৈছে ।

আনকি এগৰাকী মহিলাৰ পৰা সোণৰ গহনাও অশ্বিনীয়ে প্ৰৱঞ্চনাৰে লুট কৰাৰ অভিযোগ উত্থাপিত হৈছে । এনেদৰে সমগ্ৰ কঠীয়াতলী অঞ্চলৰ পৰা লক্ষ লক্ষ টকা প্ৰৱঞ্চনাৰে লুটি পলায়ন কৰাৰ অভিযোগ অশ্বনী মণ্ডলৰ বিৰুদ্ধে । যোৱা সোমবাৰে নগাঁৱত এখন ফাষ্টফুডৰ দোকানৰ পৰা এজনে যুৱকে আটক কৰে অশ্মিনী মণ্ডলক। পিছত স্থানীয় মহিলাই আৰক্ষীক গতাই দিয়ে অভিযুক্তগৰাকীক । অশ্বিনীৰ বিৰুদ্ধে মহিলাসকলে কঠীয়াতলী আৰক্ষী পহৰা চকীত এক গোচৰ তৰিছে।

Also Read: নগাঁৱত কংগ্ৰেছৰ প্ৰতিবাদ...