![লোকে লোকাৰণ্য কামপুৰৰ ঐতিহাসিক মাধৱ থানৰ বাকৰি](http://media.assettype.com/asomiyapratidin%2F2024-01%2F55596f1e-bc7e-430c-835f-b39e41675b99%2F4.jpg?w=480&auto=format%2Ccompress&fit=max)
ডিজিটেল সংবাদ, কামপুৰঃ নগাঁও জিলাৰ কামপুৰৰ ঐতিহাসিক শ্ৰী শ্ৰী মাধৱ থানত পাঁচদিনীয়াকৈ অনুষ্ঠিত হোৱা ভাগৱত পাঠ আৰু ব্যাখ্যা অনুষ্ঠানৰ মঙলবাৰে সফল সামৰণি পৰে ৷ প্ৰথম দিনৰ কাৰ্যসূচী অনুসৰি পুৱা বন্তি প্ৰজ্বলন কৰে জয়ধন বৰাই আৰু ধৰ্মধ্বজ উত্তোলন কৰে পদ্মকান্ত বৰদলৈয়ে ৷
পিছত ভকত বৈষ্ণৱৰ দ্বাৰা খোল-প্ৰসংগ আৰু নাম প্ৰসংগৰ পিছতেই প্ৰসাদ বিতৰণ, আদৰণি পৰ্ব, ভাগৱত স্থাপন কৰি ভাগৱতৰ শুভ উদ্বোধন কৰে কলাইখোৱাৰ লক্ষীন্দৰ মেধিয়ে ৷ পাঁচদিনীয়া ভাগৱত ব্যাখ্যা শ্ৰৱণ কৰিবলৈ মধ্য অসমৰ বহু ভক্তৰ সমাগম ঘটাৰ লগতে আজি অন্তিমটো দিনত লোকে লোকাৰণ্য হৈ পৰে থান প্ৰাংগণ । ভাগৱত পাঠ শ্ৰৱণ কৰিবলৈ যোৱা প্ৰতিজন ভক্তৰ মনোকামনা হোৱাৰ লগতে পাঠভাগৰ জৰিয়তে বিশ্ব শান্তিৰ কামনা কৰিছে আয়োজক সমিতিয়ে ।