![ৰোগীৰ মৃত্যুক কেন্দ্ৰ কৰি কচুৱাত উত্তপ্ত পৰিস্থিতিঃ পলায়ন ফাৰ্মাচিষ্ট ৰিয়াজ উদ্দিন](http://media.assettype.com/asomiyapratidin%2F2024-05%2F9aadd539-1b17-45a5-b5aa-44efc766bda2%2F6.jpg?w=480&auto=format%2Ccompress&fit=max)
ডিজিটেল সংবাদ, কামপুৰঃ মঙলবাৰে ভুল চিকিৎসাৰ পৰিণতিত কচুৱা তিনিআলি বজাৰৰ লুবনা মেডিক'জৰ সন্মুখত সহস্ৰাধিক লোকে ঘেৰাও কৰি পৰিস্থিতি উত্তপ্ত কৰি তোলে ৷ অভিযোগ উঠা মতে কচুৱা থানাৰ অন্তৰ্গত উজানমাৰী গাঁৱৰ আমান আলী নামৰ লোকজন জ্বৰত আক্ৰান্ত হোৱাত লুবনা মেডিক'জত ভৰ্তি কৰে ৷
লুবনা মেডিকজৰ স্বত্বাধিকাৰী তথা ফাৰ্মাচিষ্ট ৰিয়াজ উদ্দিনে ৰোগীজনক ভুল চিকিৎসা কৰাত কৰুণ মৃত্যুক সাৱটি লয় বুলি অভিযোগ উত্থাপন কৰিছে ৷ ৰোগীৰ মৃত্যু হোৱাত চিকিৎসক ৰিয়াজ উদ্দিনে পলায়ন কৰে ৷
উল্লেখ্য যে ৰিয়াজ উদ্দিন কেৱল ফাৰ্মাচিষ্ট যদিও বহু বছৰ ধৰি নিজৰ ঘৰতে চেম্বাৰ খুলি চিকিৎসা কৰাৰ ওপৰিও ৰোগীৰ অস্ৰোপ্ৰচাৰ কৰি ধন ঘটাৰ নানান অভিযোগ উত্থাপিত হৈছে৷ ইয়াৰ পূৰ্বেও ৰিয়াজ উদ্দিনে ভুল চিকিৎসা কৰাৰ ফলত আন এজন লোকৰো মৃত্যু হৈছিল বুলি গাওঁৰক্ষী বাহিনীৰ সম্পাদক আলাল উদ্দিনে অভিযোগ তুলিছে৷
ৰোগীৰ মৃত্যুক কেন্দ্ৰ কৰি স্থানীয় ৰাইজৰ ৰূদ্ৰমুৰ্তি দেখি মৃতকৰ পৰিয়ালৰ লগত ৰিয়াজ উদ্দিনে গোপন বুজাবুজি কৰি পলায়ন কৰে ৷ ভুৱা চিকিৎসক ৰিয়াজ উদ্দিনৰ ওপৰত প্ৰশাসনে কঠোৰ পদক্ষেপ লবলৈ বিভিন্ন মহলে দাবী জনাইছে ৷