ডিজিটেল সংবাদ, নগাঁওঃ শনিবাৰে নগাঁও কলেজ (অট’নমাচ)ৰ বুৰঞ্জী বিভাগত অনুষ্ঠিত হয় এক বক্তৃতানুষ্ঠান। এই অনুষ্ঠানৰ আঁত ধৰে বিভাগৰে মুৰব্বী অধ্যাপিকা শিৰোমণি হাজৰিকাই। ‘Conservation, Reservation and Restoration of Cultural Heritage ’ শীৰ্ষক বিষয়ত অনুষ্ঠিত হয় এই বক্তৃতানুষ্ঠানত।
উক্ত অনুষ্ঠানত সমল ব্যক্তি হিচাপে উপস্থিত থাকে সংগ্ৰহালয় প্ৰশিক্ষক বিজয় ভূঞা৷ স্নাতক চতুৰ্থ ষান্মাসিকৰ ছাত্ৰী দৰ্শনা বৰাৰ বৰগীত পৰিৱেশনেৰে আৰম্ভ হোৱা বক্তৃতানুষ্ঠানত আদৰণি ভাষণ প্ৰদান কৰে মহাবিদ্যালয়ৰ ভাৰপ্ৰাপ্ত অধ্যক্ষ ড॰ ৰঞ্জিৎ কুমাৰ মজিন্দাৰে৷ ড॰ মজিন্দাৰে বিষয়টোৰ গুৰুত্বৰ কথা অৱগত কৰি উপস্থিত সকলোকে আদৰণি জনায়৷
সমল ব্যক্তি হিচাপে উপস্থিত থাকি বিজয় ভূঞাই বিষয়টোৰ গুৰুত্ব সম্পৰ্কে সকলোকে অৱগত কৰে৷ ভাষণত তেখেতে সাঁচিপাতৰ পুথি সংৰক্ষণৰ কথা অৱগত কৰি পূৰ্বপুৰুষে এৰি যোৱা সম্পদসমূহৰ প্ৰতি সন্মান প্ৰদৰ্শন কৰিবলৈ সকলোকে আহ্বান জনায়৷
এই অনুষ্ঠানতে বুৰঞ্জী বিভাগে প্ৰস্তুত কৰা হাতেলিখা আলোচনী ‘সাঁচিপাত’ উন্মোচন কৰে নগাঁও কলেজৰ প্ৰাক্তন অধ্যক্ষ ড॰ শৰৎ বৰকটকীয়ে৷ বৰকটকীয়ে উন্মোচন কৰি হাতে লিখা আলোচনীখনৰ গুৰুত্বৰ কথা উল্লেখ কৰে৷ ড॰ বৰকটকীয়ে ভাষণত ইংলেণ্ড ভ্ৰমণৰ অভিজ্ঞতা ব্যক্ত কৰি নগাঁও কলেজৰ সংগ্ৰহালয়লৈ পাউণ্ড মুদ্ৰা আৰু পাঁচ হাজাৰ টকা মূল্যৰ বিদেশী মুদ্ৰাৰ এখন কাৰ্ড প্ৰদান কৰে৷
নগাঁও কলেজৰ আভ্যন্তৰীণ মান আশ্বাসন কোষৰ সমন্বয়ক ড॰ ভুৱন চন্দ্ৰ চুতীয়াই মহাবিদ্যালয়ৰ সংগ্ৰহালয়ৰ বিষয়ে গুৰুত্বপূৰ্ণ মন্তব্য আগবঢ়ায়৷ এই অনুষ্ঠানতে বুৰঞ্জী বিভাগৰ বিশেষ পাঠ্যক্ৰমত উত্তীৰ্ণ ছাত্ৰ-ছাত্ৰীক প্ৰমাণ পত্ৰ প্ৰদান কৰা হয়৷
উক্ত অনুষ্ঠানত কলেজৰ উপাধ্যক্ষ ড॰ পুলিন চন্দ্ৰ বৰা, বুৰঞ্জী বিভাগৰ সমূহ অধ্যাপক-অধ্যাপিকাকে ধৰি কলেজৰ অধ্যাপক-অধ্যাপিকা, এন.এছ.এছৰ সদস্যৰ লগতে দুই শতাধিক ছাত্ৰ-ছাত্ৰী উপস্থিত থাকে৷ বুৰঞ্জী বিভাগৰ মুৰব্বী অধ্যাপিকা শিৰোমণি হাজৰিকাৰ শলাগৰ শৰাইৰ দ্বাৰা অনুষ্ঠানৰ অন্ত পৰে৷
