ডিজিটেল সংবাদ,নগাঁও : নগাঁৱৰ উৰিয়াগাঁৱত অঘটন ৷ কৰুণ মৃত্যুক সাৱতি ল’লে এজন লোকে ৷ প্ৰচণ্ড গৰমৰ বাবে মৃত্যুক সাৱতি ল’লে চিৰাজুল হক নামৰ লোকজনে ৷
জানিব পৰা মতে চিৰাজুল হক পেচাত এজন ব্যৱসায়ী ৷ চাহপাত বিক্ৰীৰে জড়িত চিৰাজুল হক আন দিনাৰ দৰে উৰিয়াগাঁৱৰ বাইপাচৰ এখন চাহ দোকানত চাহপাত বিক্ৰী কৰিবলৈ সোমাইছিল ৷
বেগৰ পৰা চাহপাতৰ টোপোলা দিবলৈ লওঁতে অসুস্থ হৈ পৰা চিৰাজুল হকক দুজনে ধৰিবলৈ চেষ্টা কৰিছিল যদিও ব্যৱসায়ীজন মাটিত বাগৰি পৰে ৷ পিছত মৃত্যু হয় ৷
স্থানীয় লোকৰ মতে চিৰাজুল হক প্ৰচণ্ড গৰমৰ বাবে অসুস্হ হৈ পৰি এনে দৰে কৰুণ মৃত্যুক সাৱতি ল'ব লগা হয় ৷ নিহত ৬৫ বছৰীয়া হকৰ ঘৰ নগাঁও জিলাৰ চলচলিত ৷
