পোহৰলৈ আহিব পাহৰণিৰ গৰ্ভৰ বহু তথ্যঃ নগাঁৱৰ মহাফেজ খানা সক্ৰিয় কৰাৰ প্ৰস্তুতি...

ডিজিটেল সংবাদ নগাঁও: ৰাজ্যৰ ভিতৰতে এক গুৰুত্বপূৰ্ণ ভূমিকা গ্ৰহণ কৰি অহা এখনি জিলা নগাঁও জিলা ৷ সামাজিক,অৰ্থনৈতিক, সাংস্কৃতিক দিশত উল্লেখ্যনীয় অৱদান আগবঢ়াই আহিছে মধ্য অসমৰ প্ৰান্ত কেন্দ্ৰ নগাঁও জিলাই ৷

আজিৰ প্ৰজন্মই কিন্তু নগাঁও জিলাৰ ইতিহাস জ্ঞাত নহয় ৷ নগাঁৱৰ ইতিহাস নৱপ্ৰজন্মৰ বাবে মেলি দিবলৈ পুনৰ চেষ্টা কৰাৰ পদক্ষেপ গ্ৰহণ কৰিছে নগাঁও সদৰ সমষ্টিৰ বিধায়ক ৰূপক শৰ্মাই ৷

লগতে আছে নগাঁৱৰ উপায়ুক্ত নৰেন্দ্ৰ কুমাৰ শ্বাহে ৷ বিধায়ক ৰূপক শৰ্মাই আন্তৰিকতাৰে নগাঁৱৰ ইতিহাস অধ্যয়নৰ বাবে লোৱা পদক্ষেপ হ’ব এক ইতিবাচক খবৰ ৷

খুলিব বিচৰা হৈছে নগাঁৱৰ মহাফেজ খানাৰ দুৱাৰ ৷ মহাফেজ খানা হৈছে এখন জিলাৰ দলিল ৷ ইয়াৰ বুকুতে লুকাই আছে জিলাখনৰ ইতিহাস ৷ বন্ধ কুঠৰিত থকা ইতিহাসক নীতিগত ভাবে খোলাৰ প্ৰাৰম্ভিক পদক্ষেপ গ্ৰহণ কৰা হৈছে ৷

২০০৯ চনত নগাঁও মহাফেজ খানা আৰু গৱেষণা কেন্দ্ৰৰ বাবে কেইবাকোটি টকাৰে এটি গৃহ নিৰ্মাণ কৰা হৈছিল ৷ গৃহ নিৰ্মাণ কৰি গৃহটি মুকলি কৰা হ’ল কিন্তু কাৰ্যক্ষম কৰা নহ’ল ৷

ফলত ইতিহাস অৱগত হোৱাৰ পৰা বঞ্চিত হৈ ৰ’ল আজিৰ সমাজ ৷ নগাঁওবাসীয়ে দাবী তুলিলে নগাঁও মহাফেজ খানা আৰু গৱেষণা কেন্দ্ৰটি কাৰ্যক্ষম কৰাৰ ৷ ২০০৯ চনৰ পৰা কিন্তু মহাখেজ খানাটি কাৰ্যক্ষম নহ’ল ৷

শেহতীয়াকৈ বিধায়ক ৰূপক শৰ্মাই মহাফেজখানাটি কাৰ্যক্ষম কৰাৰ সদ্দিচ্ছাৰে জিলা উপায়ুক্তক লগত লৈ গৃহটিৰ বন্ধ দুৱাৰ খুলি পৰিদৰ্শন কৰিছে ৷ সামগ্ৰিক পৰিবেশ পৰ্যবেক্ষণ কৰি সকলো বাধা আঁতৰাই মহাফেজ খানাটি কেনেকৈ কাৰ্যক্ষম কৰিব পাৰি তাৰ বাবে পদক্ষেপ গ্ৰহণ কৰিছে ৷

জিলা প্ৰশাসনৰে কেইবালানী আলোচনা কৰি জটিলতা আঁতৰাবলৈ চেষ্টা কৰিছে বিধায়কজনে ৷ কম দিনৰ ভিতৰত নগাঁও মহাফেজ খানা আৰু গৱেষণা কেন্দ্ৰটো কাৰ্যক্ষম হোৱাৰ সম্ভৱনা আছে ৷ কেন্দ্ৰটো মুকলি হ’লে নগাঁও জিলাৰ বহু ইতিহাস পোহৰলৈ অহাটো নিশ্চিত হৈ পৰিব ৷

Also Read: ২৪ ঘণ্টা নহওতেই দুটাকৈ ডকাইটি কাণ্ডঃ দুজনক আটক...