ডিজিটেল সংবাদ, নগাঁও: নগাঁৱত শেহতীয়াকৈ চুৰিৰ লগতে বিভিন্ন অপৰাধজনিত কাম কাজ বৃদ্ধি পোৱাত নাগৰিক সমাজ উদ্বিগ্ন হৈ পৰিছে। বিশেষকৈ চুৰিৰ ঘটনা বৃদ্ধি পোৱাত গৃহস্থৰ নিদ্ৰা হৰিছে। আৰক্ষী প্ৰশাসনৰ দুৰ্বলতাৰ সুযোগ গ্ৰহণ কৰি চোৰৰ দলে ইটোৰ পিছত সিটোকৈ চুৰি কাৰ্য সংঘটিত কৰি গৈছে।
বৃহস্পতিবাৰে নিশাও নগাঁও চহৰৰ অতি গুৰুত্বপূৰ্ণ পথ ভি আই পি পথত থকা মাৰুতি চূজুকীৰ 'কাশলিৱাল অট প্ৰাইভেট লিমিটেড' নামৰ গাড়ীৰ পাৰ্টছ প্ৰতিষ্ঠানটোত এক চুৰি কাণ্ড সংঘটিত হয়। জানিব পৰামতে বৃহস্পতিবাৰে নিশা অভিনৱ কৌশলেৰে চোৰৰ দলে প্ৰতিষ্ঠানখনত লুটপাত চলায়। চোৰৰ দলে প্ৰতিষ্ঠানখনৰ ছাটাৰ ভাঙি ভিতৰত প্ৰৱেশ কৰাৰ লগতে চিচি টিভি বিকল কৰি চুৰিকাৰ্য সংঘটিত কৰে। চোৰৰ দলে প্ৰতিষ্ঠানখনৰ পৰা ১লাখ ৩৪ হাজাৰ ৪৩৬ টকা লুট কৰি নিয়াৰ লগতে চিচি টিভিৰ সম্পূৰ্ণ সা সৰঞ্জাম খুলি লৈ যায়। তদুপৰি প্ৰতিষ্ঠানখনৰ পৰা মাৰুতি চুজুকীৰ কিছু পাৰ্টছ চুৰি কৰি নিয়ে।
শুকুৰবাৰে পুৱা এই কথা জানিব পাৰি প্ৰতিষ্ঠানৰ স্বত্বাধিকাৰী আৰু কৰ্মচাৰী হতভম্ব হৈ পৰে। পিছত নগাঁও সদৰ আৰক্ষী থানাত ঘটনা সম্পৰ্কে অৱগত কৰাত ঘটনাস্থলীত আৰক্ষী উপস্থিত হৈ অনুসন্ধান চলাই যদিহে বাতৰি লিখা সময়লৈকে কাকো গ্ৰেপ্তাৰ কৰিব পৰা নাই। উল্লেখ যে বিগত কিছুদিনৰ ভিতৰত নগাঁও চহৰৰ আভিজাত এলেকা আমোলাপট্টীকে ধৰি কেবাটাও স্থানত চুৰিকাৰ্য সংঘটিত হৈছিল। আনকি দিনদুপৰতে ঘৰত কোনো নথকাৰ সুযোগ গ্ৰহণ কৰি কেবাঠাইতো চোৰে চাফাই অভিযান চলাই। পৰিস্থিতি এনে হৈছে যে নগাঁৱত ঘৰ এৰি কোনো লোক যাৱ নোৱাৰা হৈছে।
