ডিজিটেল সংবাদ কলিয়াবৰ: কলিয়াবৰৰ বুঢ়াপাহাৰত দেওবাৰে দিনৰ ১১ বজাত এক ভয়ংকৰ পথ দুৰ্ঘটনা সংঘটিত হয় ৷ দুৰ্ঘটনাটোত টেম্পো আৰোহী এটি শিশুসহ টেম্পোখনৰ ৮ জন লোকৰ কথমপি প্ৰান ৰক্ষা পৰে ৷
জানিব কৰা মতে, কাৰ্বি আংলঙৰ ৰংমং ৱে'ৰ পৰা জখলাবন্ধা অভিমুখী এ এছ ০২ ডি চি ১২০৩ নম্বৰৰ যাত্ৰীবাহী টেম্পোখনত বুঢ়াপাহাৰৰ ৩৭নং ৰাষ্ট্ৰীয় ঘাইপথত বিপৰীত অভিমুখী এ এছ ০২ ডি চি ১৭৭৫ নম্বৰৰ টাটা ডি আই বাহন খনে মুখামুখীকৈ খুন্দা মৰাৰ ফলতে দুৰ্ঘটনাটো সংঘটিত হয় ৷ দুৰ্ঘটনাটোৰ ফলত দুয়োখন বাহন পথৰ দাতিত বাগৰি পৰে ৷
দুৰ্ঘটনাটোত টেম্পো আৰোহী ক্ৰমে দাৰসিং ইংতি(৩৮),অমল কাথাৰ(২০),সোনালী টেৰনপি,সিং ক্ৰান্সি(৩১),ৰিনা ক্ৰান্সিপি(৩২),ৰূপ্তালিন কাঠাৰপি(১৬),মানাই কাঠাৰপি(৩১)আৰু জনৈক কাথাৰ নামৰ এটি ১২ বছৰীয়া শিশু গুৰুতৰভাবে আহত হয়৷ আহতসকলক জখলাবন্ধাৰ কলিয়াবৰ মহকুমা চিকিৎসালয়ত প্ৰাথমিক চিকিৎসা প্ৰদান কৰি উন্নত চিকিৎসাৰ বাৱে তেজপুৰ চিকিৎসা মহাবিদ্যালয়লৈ প্ৰেৰণ কৰা হয় ৷
প্ৰত্যক্ষদৰ্শীয়ে জানিবলৈ দিয়া মতে,গৰু কঢ়িওৱাত ব্যৱহাৰ হোৱা টাট ডি আইখনে ভুল দিশত গৈ টেম্পোখনত খুন্দিয়াইছিল ৷ দুৰ্ঘটনাটোত আহতসকলৰ অধিকাংশৰে অৱস্থা সংকটজনক ৷
কোনোৱগৰাকী আহতৰ যদি দুয়োখন ভৰি ভাগিছে আন কোনাৱাজনৰ ভাঙিছে দুয়োখন হাত আৰু কঁকাল ৷ ১২ বছৰীয়া শিশুটিও বিপদমুক্ত নহয় বুলি চিকিৎসকে জানিবলৈ দিছে ৷
