নলবাৰী জিলাৰ মহিলা আত্মসহায়ক গোটৰ বাবে ড্ৰোন প্ৰশিক্ষণ কাৰ্যসূচীৰ শুভাৰম্ভ...

ডিজিটেল ডেস্কঃ গ্ৰাম্য উন্নয়নত বিজ্ঞান আৰু প্ৰযুক্তিৰ সদ্ব্যৱহাৰৰ উদ্দেশ্যে প্রধানমন্ত্রী নৰেন্দ্ৰ মোডীয়ে জনোৱা আহ্বান মর্মে আজি চান্দকুছিস্থিত নলবাৰী পলিটেকনিকত জনস্বাস্থ্য কাৰিকৰী বিভাগৰ মন্ত্ৰী জয়ন্ত মল্লবৰুৱাই নলবাৰী জিলা প্রশাসনে অসম ৰাজ্যিক গ্রাম্য জীৱিকা অভিযান(ASRLM)-ৰ সহযোগত আয়োজন কৰা মহিলা আত্মসহায়ক গোটৰ সদস্যক ড্ৰোন চালনা আৰু মেৰামতি কৰাৰ প্রশিক্ষণ কার্যসূচী উদ্বোধন কৰে।

নলবাৰী জিলাত আৰম্ভ হোৱা এই ৬ দিনীয়া প্রশিক্ষণ পর্বত ৪০ গৰাকী মহিলাক ড্ৰোন প্ৰযুক্তিৰ প্রশিক্ষণ দিয়া হ'ব যিয়ে ভূমি জৰীপ, ভূঁই ৰোৱা আদিকে ধৰি কৃষি কার্য সম্পন্ন কৰা আদিত যথেষ্ট সহায় কৰিব। আজিৰ এই কাৰ্যসূচী উদ্বোধন কৰি মন্ত্ৰী বৰুৱাই উল্লেখ কৰে যে, এই কাৰ্যসূচীৰ জৰিয়তে পোনপ্ৰথমবাৰৰ বাবে ভাৰতত মহিলা আত্ম সহায়ক গোটৰ সদস্যক ড্ৰোন চালনৰ প্ৰশিক্ষণ দিয়া হ'ব।

তেখেতে লগতে কয় যে, অসমত প্ৰায় ৪০ লাখ আত্ম সহায়ক গোটৰ আই মাতৃ আছে যিয়ে তেখেতসকলৰ কামৰ জৰিয়তে নিজক প্ৰতিষ্ঠিত কৰিছে আৰু এনে আধুনিক ড্ৰোন চালনৰ প্ৰশিক্ষণৰ ব্যৱস্থাই তেওঁলোকক আৰু অধিক স্বাৱলম্বী কৰিব। এই প্ৰশিক্ষণ কাৰ্যসূচীৰ সফলতাৰ ওপৰত নিৰ্ভৰ কৰি পৰৱৰ্তী সময়ত অসমৰ আন আন জিলাতো এই কাম আৰম্ভ কৰিব বুলি মন্ত্ৰী বৰুৱাই উল্লেখ কৰে।

উল্লেখযোগ্য যে, এই প্ৰথম পৰ্যায়ৰ প্ৰশিক্ষণ গ্ৰহণ কৰা ৪০ গৰাকী প্ৰাৰ্থীৰ ভিতৰত ১০ গৰাকী প্ৰাৰ্থী পলিটেকনিক উত্তীৰ্ণ। তাৰোপৰি এই প্ৰশিক্ষণ কাৰ্য সূচাৰুৰূপে সম্পন্ন কৰা প্ৰাৰ্থীক পৰবৰ্তী পৰ্যায়ত মাষ্টাৰ ট্ৰেইনাৰ হিচাপে নিযুক্তি দিয়াৰো সম্ভাৱনা আছে।

আজিৰ সভাত জিলা উপায়ুক্ত, ASRLM-ৰ মিছন সঞ্চালক আৰু এই প্ৰশিক্ষণ শিবিৰৰ প্ৰশিক্ষণ দাতা 'ইণ্ডিয়ান ড্রোন একাডেমি'ৰ মুখ্য কাৰ্যবাহী বিষয়া উপস্থিত থাকে।

In accordance with the Hon'ble PM @narendramodi Ji's call to harness the potential of science and technology for rural development, I am pleased to inaugurate a Training Program on Drone Operation and Repair organized by the Nalbari District Administration in collaboration with… pic.twitter.com/JPCd3yUfSt

— Jayanta Mallabaruah (@jayanta_malla) October 2, 2023

Also Read: ভ্ৰাম্যমাণ থিয়েটাৰ থাকিব, নাথাকিব ৰুচিশীল দৰ্শক !