ৰাষ্ট্ৰীয় নাট মহোৎসৱত নাগালেণ্ড হিলছ থিয়েটাৰৰ 'উচ য়ম দা লেংগুৱেজ ভিলেজ' প্ৰদৰ্শন

ডিজিটেল সংবাদ,বেকাজানঃ পাহাৰৰ নামনিত প্ৰকৃতিৰ বিনন্দীয়া মুকলি মঞ্চত নাট উপভোগ কৰিবলৈ হিলদল ভাঙি ওলাই আহিল তিতাবৰৰ বান্দৰচলিয়াৰ অসম-নাগালেণ্ডৰ সহস্ৰাধিক গাঁৱবাসী । উদং পথাৰৰ নৰা-খেৰ কাটি মঞ্চ তৈয়াৰ কৰি তথা বাঁহৰ আৰামী চকীত বহি উপভোগ কৰিছে ফুটহিলছ নেচনেল ড্ৰামা ফেষ্টিভেলৰ আগশাৰীৰ অপেছাদাৰী নাট্য দলৰ কলাত্মক নাটক ।

তিনিদিনীয়া এই নাট ফুটহিলছ নাট মহোৎসৱৰ লক্ষ্য হৈছে নগা অসমীয়া মাজত সীমান্তত সংঘাত নহয় বৰঞ্চ দুয়োখন চুবুৰীয়া ৰাজ্য মাজত নাটকৰ জৰিয়তে শান্তি আৰু সমন্বয়ৰ বাৰ্তা বিনিময় কৰা । তাহানিৰ সেই ডালিমী গদাপাণিৰ ঐতিহাসিক দিনৰে চলি অহা অসমীয়া আৰু নগা মাজত সাতামপুৰুষীয়া শান্তি সম্প্ৰীতি সুদৃঢ় কৰি ৰখাৰ উদ্দেশ্য দেওবাৰৰ পৰা তিনিদিনীয়াকৈ অনুষ্ঠিত হৈছে পাদদেশীয় ৰাষ্ট্ৰীয় নাট্য মহোৎসৱ ।

সোমবাৰে দ্বিতীয় দিনাৰ মূল নাট মহোৎসৱৰ মুকলিমঞ্চ উদ্বোধন কৰে ৰাজ্যসভাৰ সাংসদ কাম্যাখা প্ৰসাদ তাছাই । মঞ্চ উদ্বোধন কৰি সাংসদ তাছাই কয় "মই প্ৰকৃতিৰ মুকলি মঞ্চত নাটক মঞ্চস্থত কৰা কেতিয়াও দেখা নাছিলো । এই ব্যতিক্ৰমী প্ৰচেষ্টা শলাগিব লগা । ফুটহিলছ নেচনেল ড্ৰামা ফেষ্টিভেলৰ নাটকত কোনো বাহ্যিকতা নাই । ইয়াত জীৱনৰ কথাবোৰ নাটক মাধ্যমেৰে মঞ্চস্থ কৰা হৈছে । সচাকৈ অনন্য । এই ব্যতিক্ৰমী নাট্য পৰিবেশন শৈলীক মানুহে গ্ৰহণ কৰিছে । কৃত্ৰিম মঞ্চ ব্যৱহাৰ নকৰাকৈ এই পাদদেশীয় ৰাষ্ট্ৰীয় নাট মহোৎসৱে নাটকক কলাত্মক ৰূপত সুন্দৰকৈ উপস্থাপন কৰিছে । এই নাট মহোৎসৱে নগা আৰু অসমীয়া মাজত সম্প্ৰীতি এনাজৰীডাল সুদৃঢ় কৰিব ।"

ইফালে আজি ফুটহিলছ নেচনেল ড্ৰামা ফেষ্টিভেলত নাগালেণ্ডৰ ' নাগালেণ্ড হিলছ থিয়েটাৰৰ' শিল্পী কলা-কৌশলীসকেল মঞ্চস্থ কৰে জনপ্ৰিয় নাট্যকাৰ বেনডাঙ ৱালিঙৰ ৰচনা আৰু পৰিচালনাৰ নাট ' উচ য়ম দা লেংগুৱেজ ভিলেজ ' প্ৰদৰ্শন কৰে । আনহাতে তেজপুৰ ঝংকাৰ থিয়েটাৰে পৰিবেশন কৰে ' দা স্মল বাৰ্ড' নাট ।

তদুপৰি নাট পৰিবেশনৰ মাজতে অসম আৰু নাগালেণ্ডৰ বহুকেইটা সাংস্কৃতিক দলে বিভিন্ন জনগোষ্ঠীয় বাৰেৰহনীয়া কলা -সংস্কৃতি প্ৰদৰ্শন কৰে । উল্লেখযোগ্য যে তিনিদিনীয়া বৰ্ণাঢ্য কাৰ্যসুচীৰে অনুষ্ঠিত এই নাট মহোৎসৱ শুভাৰম্ভ কৰে ঠেঙ্গাল কছাৰী স্বায়ত্ত-শাসিত পৰিষদৰ মুখ্য কাৰ্যবাহী সদস্য প্ৰতাপ কছাৰীয়ে ।

উল্লেখযোগ্য যে তিতাবৰ বিনয় শইকীয়া আৰু পঞ্চানন দুৱৰা, নৰেন তাঁতী কপিল বৰুৱা আৰু পুলক কছাৰীৰ দৰে নাটক ভাল পোৱা কেইজনমান লোকৰ উদ্যোগ অসম- নাগালেণ্ড সীমান্তৰ পাদপ্ৰদেশত আয়োজন কৰা হৈছে এই পাদদেশীয় ৰাষ্ট্ৰীয় নাট মহোৎসৱ ২০২৩ । কাইলৈ এই পাদদেশীয় ৰাষ্ট্ৰীয় নাট মহোৎসৱত অসমৰ কেইবাটাও প্ৰখ্যাত নাট্য দলৰ লগতে নাগালেণ্ড নাট্য দলে নাট প্ৰদৰ্শন কৰিব ।

উদ্যোক্তাসকলে জানিবলৈ দিয়া মতে অসম আৰু নাগালেণ্ডৰ মাজত অনুষ্ঠিত হ'ব লগা এই পাদদেশীয় ৰাষ্ট্ৰীয় নাট্য মহোৎসৱৰ উদ্দেশ্যে হৈছে নাটকৰ জৰিয়তে সাংস্কৃতিক সমন্বয় গঢ়া । বিশেষকৈ নাটক যে এক প্ৰাকৃতিক পৰিবেশত কৰিব পাৰি সেই ব্যতিক্ৰমী চিন্তাৰে এই পাদদেশীয় ৰাষ্ট্ৰীয় নাট মহোৎসৱৰ জন্ম । প্ৰাকৃতিক পৰিবেশত মুকলি মঞ্চত নাট প্ৰদৰ্শন কৰা উজনি অসমৰ প্ৰথম চিন্তা ।

আটাইতকৈ ভাল লগা কথা এই এই পাদদেশীয় নাট মহোৎসৱৰ বাবে তাঁতী গাঁৱৰ ২১ ঘৰৰ মানুহে এটকা পাৰিশ্ৰমিক নোলোৱাকৈ বাঁহ নৰা-খেৰে মঞ্চ আৰু দৰ্শক বহিৰ বাবে সকলো ব্যৱস্থা গঢ়ি তুলিছে । এয়াই নাটকৰ প্ৰতি ৰাইজৰ ভাল পোৱা ।

ইতিমধ্যে নগা পাহাৰ পৰা বাঁহ -কাঠ আৰু ভৈয়ামৰ পৰা ধানৰ নৰা আনি পাহাৰীয়া মুকলি পৰিবেশত আটকধুনীয়াকৈ নিৰ্মাণ কৰা মঞ্চত মঞ্চস্থ কৰা ব্যতিক্ৰম ধৰ্মী নাট উপভোগ কৰিব সহস্ৰাধিক দৰ্শক উৎফুল্লিত হৈ পৰিছে ।

আৰু পঢ়কঃ নেতাজীৰ জন্ম জয়ন্তী উপলক্ষে মাদকদ্ৰব্য,বাল্যবিবাহ-পথ সুৰক্ষা সম্বন্ধে সজাগতা সভা