ডিজিটেল সংবাদ, দলগাঁও : দলগাঁৱত পুনৰ অস্ত্রসহ চাৰিজন চোৰাং চিকাৰীক আটক কৰিছে আৰক্ষীয়ে। ওৰাং ৰাষ্ট্ৰীয় উদ্যানত গঁড় হত্যাৰ পৰিকল্পনাৰে আহিছিল এই ৪ জন দুৰ্ধৰ্ষ চোৰাং চিকাৰী।
ইয়াৰোপৰি আৰক্ষীয়ে উদ্ধাৰ কৰিছে এটা . ৩০৩ ৰাইফল, ১০ টা সজীৱ গুলি, তিনিটা মোবাইল, ৫খন মটৰচাইকেল আৰু এখন ই-ৰিক্সা। আৰক্ষীয়ে আটক কৰা ধৃত কেইজন হৈছে- নুৰ হুছেইন, আবুল হুছেইন, জাফৰ আলী আৰু নুৰ ইছলাম। আটাইকেইজনৰ ঘৰ উদ্যানখনৰ কাষৰ কাছোমাৰী সোনাৰী গাঁৱত।
এইখিনিতে উল্লেখ কৰিব পাৰি যে মঙ্গলবাৰে দিনৰ ভাগত দৰং আৰক্ষীয়ে দলগাঁৱৰ কাছোমাৰী সোনাৰী গাঁৱত গোপন সূত্ৰৰ ভিত্তিত অভিযান চলাই জব্দ কৰে বাহন কেইখন। ইফালে আবুল হুছেইনৰ স্বীকাৰোক্তিৰ ভিত্তিত দলগাঁৱৰ কাছোমাৰী সোনাৰী গাঁৱত এটা পুখুৰীত পুতি থোৱা অৱস্থাত উদ্ধাৰ কৰে অস্ত্রখিনি।
