কলকাতাৰ শিশিৰ মঞ্চত কবি জীৱন নৰহৰ যাপনচিত্ৰ ৰাষ্ট্ৰীয় কাব্য বঁটা গ্ৰহণ

ডিজিটেল সংবাদ, বোকাখাত/বেবেজীয়াঃ কলকতাৰ শিশিৰ মঞ্চত দেশৰ প্ৰসিদ্ধ কন্নড় কবি-নাট্যকাৰ এইছ.এছ.শিৱপ্ৰকাশ আৰু হিন্দী কবি অৰুণ কমলৰ পৰা কবি জীৱন নৰহৰ যাপনচিত্ৰ ৰাষ্ট্ৰীয় কাব্য বঁটা গ্ৰহণ কৰে। এই বঁটাৰ বাবে দেশৰ ১৫জন তালিকাভুক্ত কৰা কবিৰ মাজৰ পৰা জীৱন নৰহক নিৰ্বাচন কৰা হৈছিল।

এই বঁটাৰ নিৰ্বাচক দেশৰ প্ৰসিদ্ধ ৫ জন কবি-সমালোচক, সাহিত্য একাডেমিৰ সচিব,সাহিত্য একাডেমি বঁটা প্ৰাপক,ইণ্ডিয়ান লিটাৰেচাৰৰ প্ৰা: সম্পাদক, এন.বি.টি, বিৰলা ফাউণ্ডেশ্যন প্ৰা: চেয়াৰমেন কে.সচ্চিদানন্দন (মালায়ালম ),এইছ.এছ শিৱপ্ৰকাশ,অৰুণ কমল, নিৰ্মলকান্তি ভট্টাচাৰ্য্য (বঙালি),এ.জে থমাছ(ইংৰাজী) দৰে বৰেণ্য ব্যক্তি আছিল।

কলকাতাত আয়োজিত এই বঁটা প্ৰদান অনুষ্ঠানত কবি জীৱন নৰহে আনুষ্ঠানিকভাৱে দেশৰ আগশাৰীৰ উচ্চ শিক্ষানুষ্ঠান জৱাহৰলাল নেহৰু বিশ্ববিদ্যালয়ৰ প্ৰাক্তন অধ্যাপক, সংগীত নাটক অকাডেমিৰ বঁটা প্ৰাপক এইছ এছ শিৱপ্ৰকাশ আৰু আনগৰাকী সাহিত্য অকাডেমি বঁটা প্ৰাপক বিশিষ্ট হিন্দী কবি অৰুণ কমলৰ পৰা বঁটা গ্ৰহণ কৰে।

স্মৰ্তব্য যে কলকতাৰ পৰা প্ৰকাশিত ক্ষুদ্ৰ আলোচনী 'যাপনচিত্ৰ'ই সুদীৰ্ঘ ২০ বছৰ পূৰ্ণ কৰা উপলক্ষে এই বৰ্ষৰ পৰা 'যাপনচিত্ৰ ৰাষ্ট্ৰীয় কাব্য বঁটা' ৰ প্ৰবৰ্তন কৰি সৰ্ব প্ৰথম এই বঁটা নগাঁৱৰ আনন্দৰাম ঢেকিয়াল ফুকন মহাবিদ্যালয়ৰ অধ্যাপক কবি- সাহিত্যিক জীৱন নৰহলৈ আগবঢ়াইছে। এই বঁটাত আছে এখন স্মাৰক, প্ৰশংসা পত্ৰ আৰু নগদ ৫০ হাজাৰ টকা।

ৰাষ্ট্ৰীয় পৰ্যায়ৰ এটা বঁটা গ্ৰহণ কৰি কবি জীৱন নৰহে নিজৰ ভাষণ প্ৰসংগত কয় "আমি এজন অসমীয়া ভাষাত কবিতা লেখা ভাৰতীয় কবি। জন্ম সূত্ৰে মিচিং জনগোষ্ঠীৰ এজন অসমীয়া। মোৰ জন্মভূমিৰ ঐতিহ্য চেতনাক মোৰ কবিতাৰ মাজত ধাৰণ কৰি কবিতাৰ বিশাল ক্ষেত্ৰখনত লীন নিয়াবলৈ নিৰন্তৰ প্ৰয়াস কৰাৰ বাবে আজিও চেষ্টা চলাই আছোঁ। আমাৰ কবিতাৰ স্বকীয়তাৰ শিপাডালো সেইকাৰণে থলুৱা জীৱন- সংস্কৃতিৰ পথেৰে আহি ব্ৰহ্মপুত্ৰত লাগি ভাৰতৰ বৃহৎ নদীবোৰত সংযোগ হৈছে।এই কাৰণেই আমি কেৱল ভাৰতীয় কবি হিচাপে পৰিচয় নিদি অসমীয়া -ভাৰতীয় কবি হিচাপেহে নিজকে পৰিচয় দি ভালপাওঁ।"

বিগত ২০০২ চনত বৰেণ্য সাহিত্যক সুনীল গঙ্গোপাধ্যায় ,যোগেন চৌধুৰী, সমিক বন্দ্যোপাধ্যায়ক উপদেষ্টা মণ্ডলী হিচাপে লৈ ক্ষুদ্ৰ কাব্য আলোচনী হিচাপে আৰম্ভ কৰা এই যাপনচিত্ৰই পিছলৈ প্ৰকাশন গোষ্ঠী হিচাপেও আত্মপ্ৰকাশ কৰে আৰু চলিত বৰ্ষৰ পৰা 'যাপনচিত্ৰ ৰাষ্ট্ৰীয় কাব্য বঁটা' দিয়াৰ সিদ্ধান্ত গ্ৰহণ কৰে । পোন প্ৰথমবাৰ কবি জীৱন নৰহে সেই বঁটাৰে সন্মানিত হৈ ৰাষ্ট্ৰীয় স্বীকৃতিৰে ৰাজ্যবাসীলৈ সুনাম কঢ়িয়াই আনিছে ।

বৰ্তমানলৈকে জীৱন নৰহৰ ৫খন কবিতা পুথি- ঢৌ খেলা ল'ৰালিৰ ছাঁ,তুমি পকা ধানৰ দৰে গোন্ধাইছা,টাৰি-ৰি ,হালধীয়া উপমা,মোমাইদেউৰ ফুলনি,তিনিখন ইংৰাজীলৈ অনুবাদ হোৱা কাব্য গ্ৰন্থ- The Buddha and Other Poems ,The Orange Hill, Listen my Flowerbud : Mising tribal oral poetry of Assam, এখন মাৰাঠীলৈ অনুবাদ হোৱা কাব্যগ্ৰন্থ -জীৱন নৰচী অচমী কবিতা ,দুখন বঙালী ভাষালৈ অনুদিত কাব্যগ্ৰন্থ- জীৱন নৰহেৰ নিৰ্বাচিত কবিতা, সোৱণশিৰি আৰ জোন-বেলি লগতে দুখন উপন্যাস-অইকলি, চোৱা পীতাম্বৰ শ্যাম বৰণ মেঘ উৰে, তিনিখন গদ্য পুথি- ভূমিৰ ফুল,সোঁৱৰণিৰ ছাঁ,চাৰিটা ৰোমাণ্টিক প্ৰবন্ধ,অসমীয়া হিচাপে নিজৰ বিবেকক টুকুৰিয়াই চাওক, তিনিখনখন সম্পাদিত পুথি- অ' মোৰ আপোনাৰ দেশ : লক্ষ্মীনাথ বেজবৰুৱা, জাতীয় সংগীত চৰ্চা আৰু সমন্বয়ৰ পথ, বেজবৰুৱাৰ সাধুৰ আলমত অংকিত ছবি আৰু অকণিৰ সাধু,মহিম বৰাৰ ৰচনা সমগ্ৰ প্ৰকাশ পাইছে ।

তদুপৰি তেওঁৰ কবিতা দেশীবিদেশী ভাষালৈ অনুবাদ হোৱাৰ লগতে অক্সফৰ্ড,পেঙ্গুইন আদিৰ পৰা প্ৰকাশিত কাব্যগ্ৰন্থত আৰু ব্লুমছবেৰিৰ পৰা প্ৰকাশিত 100 more Indian poems, Great Indians Love poems, সাহিত্য একাডেমিৰ পৰা প্ৰকাশিত In Indian Literature 1957-2007 গ্ৰন্থত কবিতা অন্তৰ্ভুক্ত হৈছে। জীৱন নৰহে কাব্য চৰ্চাৰ লগতে সুদীৰ্ঘকাল মাতৃভাষা মাধ্যমৰ হকে নিৰন্তৰ কাম কৰি আহিছে।

Also Read: গ্ৰীষ্মৰ আগমনৰ পূর্বে ১২০ মেগৱাত বিদ্যুৎ উৎপাদনৰে সাজু নামৰূপ তাপ বিদ্যুৎ প্ৰকল্প