ৰঙিয়া বি এড কলেজৰ প্ৰেক্ষাগৃহত 'সৰাপাতত ফাগুনৰ চিঠি' শীৰ্ষক কাব্যানুষ্ঠান...

ডিজিটেল সংবাদ, ৰঙিয়াঃ ৰঙিয়াত ৰবিবাৰে সৰাপাতত ফাগুনৰ চিঠি শীৰ্ষক এখনি কাব্যানুষ্ঠান অনুষ্ঠিত হয় । অসম সাহিত্য সভাৰ স্বৰ্ণ শাখাৰ ৰঙিয়া আলোচনী সভাৰ উদ্যোগত আয়োজিত কাব্যানুষ্ঠান খনিত ৰঙিয়া, তামুলপুৰ, গোৰেশ্বৰ,বৰমা, গুৱাহাটীকে ধৰি প্ৰায় ডেৰ কুৰি কবিয়ে অংশগ্ৰহণ কৰি স‌্ব-ৰচিত কবিতা পাঠ কৰে ।

উল্লেখ্য যে ৰঙিয়াৰ বি এড কলেজৰ প্ৰেক্ষাগৃহত আলোচনী সভাৰ সম্পাদক নুৰুল আমিন আৰু কবি মুস্তাফা কামাল আহমেদে সঞ্চালনা কৰা কাব্যানুষ্ঠান খনিত আৰম্ভণিতে অসম সাহিত্য সভাৰ "চিৰ চেনেহী মোৰ ভাষা জননী " গীত পৰিৱেশন কৰে সদৌ অসম লেখিকা সমাৰোহ সমিতিৰ ৰঙিয়াৰ শিল্পীসকলে ।

তাৰ পাছত কাব্যানুষ্ঠান খনৰ লক্ষ্য আৰু উদ্দেশ্য ব্যাখ্যা কৰি সম্পাদক নুৰুল আমিনে কয় কবিতা মানুহৰ এক বিস্তাৰিত চেতনা, কবিতা লিখিলেও তাৰ যুদ্ধ কেতিয়াও শেষ নহয় । আজিও মানুহ জীয়াই আছে কবিতাৰ বাবে,লিখি গৈছে কবিতা, কেৱল সমাজৰ ঘৃণাবিহীন বা যুদ্ধবিহীন পৃথিৱী বিচাৰি ।

কবিসকলক এখন মঞ্চ তৈয়াৰ কৰাই এক গুৰু দায়িত্ব বুলি উল্লেখ কৰে । ইফালে কাব্যানুষ্ঠান খনিত উত্তৰ কামৰূপ মহাবিদ্যালয়ৰ অসমীয়া বিভাগৰ অধ্যাপক ড° নীলোৎপল শৰ্মাই উপস্থিত থাকি " আধুনিক কবিতাৰ নিৰ্মাণ" শীৰ্ষক এলানি বক্তৃতা আগবঢ়ায় । শেষত সাহিত্য অকাডেমী বঁটা প্ৰাপক কবি দ্বিজেন দাস, শিশু সাহিত্যিক ভূপেন চন্দ্ৰ দাসে কবিতাৰ বিষয়বস্তু আৰু সাহিত্য চৰ্চাৰ ওপৰত গুৰুত্বপূৰ্ণ দিশ সম্পৰ্কে আলোকপাত কৰে ।

Also Read: শিশু যৌন নিৰ্যাতনকাৰীক ২০ বছৰৰ সশ্ৰম কাৰাদণ্ড...