জ্যেষ্ঠ অধিবক্তা যুগল বুঢ়াগোঁহাইক প্ৰদেশ কংগ্ৰেছৰ অ বি চি বিভাগৰ অধ্যক্ষ নিযুক্তি

ডিজিটেল সংবাদ, ঢকুৱাখনা : অসম প্ৰদেশ কংগ্ৰেছ সমিতিৰ এক গুৰুত্বপূৰ্ণ আৰু  শক্তিশালী শাখা অন্যান্য পাছপৰা শ্ৰেণী বিভাগ (অ বি চি)ৰ ৰাজ্যিক অধ্যক্ষ হিচাবে বিশিষ্ট অধিবক্তা যুগল বুঢ়াগোহাঁইক নিযুক্তি দিয়া হৈছে । নিখিল ভাৰত কংগ্ৰেছ সমিতিৰ সভাপতি মল্লিকাৰ্জুন খাৰ্গেৰ অনুমোদনক্ৰমে নিখিল ভাৰত কংগ্ৰেছ সমিতিৰ সাধাৰণ সম্পাদক, সাংসদ কে চি ভেনুগোপালৰ যোৱা ১৬ মাৰ্চত স্বাক্ষৰিত এক নিৰ্দেশনা যোগে জৰুৰী ভাবে কাৰ্যকৰী হোৱাকৈ জ্যেষ্ঠ অধিবক্তা গৰাকীক এই পদত নিযুক্তি প্ৰদান কৰা হৈছে ।

ধেমাজি উকীল সন্থাৰ প্ৰাক্তন সভাপতি বিশিষ্ট অধিবক্তা বুঢ়াগোঁহাইৰ ঘৰ ধেমাজি জিলাৰ মাছখোৱাৰ গোঁহাই গাঁৱত । ইতিমধ্যে নৱ নিযুক্ত ৰাজ্যিক অধ্যক্ষ গৰাকীয়ে ত্ৰৈলোক্য পাঠক, যতীন পাঠক, জ্যোতি প্ৰসাদ গগৈ, জয় প্ৰকাশ গুপ্তাক উপ সভাপতি, সুভাষ দিহিঙীয়াক সাধাৰণ সম্পাদক (প্ৰশাসন), প্ৰণৱ শইকীয়াক সাধাৰণ সম্পাদক( সাংগঠনিক) হিচাবে লৈ এখন শক্তিশালী সমিতি গঠন কৰি দিছে।

এগৰাকী সুদক্ষ ক্ৰীড়াবিদ হিচাবে সুখ্যাতি থকা বুঢ়াগোঁহাইয়ে অল আচাম লয়াৰ্ছ এচ'চিয়েচনৰ সদস্য, সদৌ অসম ফুটবল সন্থাৰ পৰিচালনা সমিতিৰ সদস্য  হিচাবে সফল কাৰ্যনিৰ্বাহ কৰি আছে । বিশিষ্ট অধিবক্তা বুঢ়াগোঁহাইয়ে এই পদত নিযুক্তি লাভ কৰাত বিভিন্ন ব্যক্তি, দল আৰু সংগঠনে অভিনন্দন জনাইছে। নৱ নিযুক্ত ৰাজ্যিক অধ্যক্ষ গৰাকীয়ে অনাগত সময়ত দলে ন্যস্ত  কৰা দায়িত্ব আৰু কৰ্তব্য নিষ্ঠা আৰু সততাৰে পালন কৰি  দলটোক অধিক গতিশীলতা প্ৰদান কৰি যাব বুলি সংবাদ মাধ্যমক জানিবলৈ দিছে ।

Also Read: আন্তৰ্জাতিক প্ৰীতি মেছত আৰ্জেন্টিনাৰ জয়, দেশৰ হৈ ৯৯ সংখ্যক গ'ল মেছিৰ