![চলন্ত ৰে'লত যুৱতীৰ শ্লীলতাহানিৰ চেষ্টা : সামাজিক মাধ্যমত জনালে সমগ্ৰ ঘটনা](http://media.assettype.com/asomiyapratidin%2F2023-12%2F3931bc7e-b0a4-4cba-91a5-ca1b7f005011%2FAP_FOR_WEB_train.jpg?w=480&auto=format%2Ccompress&fit=max)
ডিজিটেল সংবাদ,শিলচৰ : নিশা চলন্ত ৰে'লত যুৱতীক শ্লীলতাহানিৰ চেষ্টা এগৰাকী পাষাণ প্ৰকৃতিৰ যাত্ৰীৰ। শিয়ালদাহ-শিলচৰ কাঞ্চনজংঘা এক্সপ্ৰেছত সংঘটিত হৈছে এই ঘটনা ৷ ফেইচবুক লাইভৰ দ্বাৰা লম্পট যাত্ৰীগৰাকীৰ কুৰ্কম পোহৰলৈ আনিছে ভুক্তভোগী যুৱতীগৰাকীয়ে ৷
ৰে'লখনত আন যাত্ৰীৰ সহযোগত মাজনিশা ৰঙিয়া ৰে'ল আৰক্ষীক সমজাই দিয়া হৈছে লম্পট যাত্ৰীগৰাকীক ৷ ধৃত ব্যক্তিগৰাকীৰ নাম অভিজিৎ ৰাউত বুলি জানিব পৰা গৈছে ৷
জানিব পৰামতে ভুক্তভোগী যুৱতীগৰাকীয়ে পৰিয়ালৰ সৈতে শিয়ালদাৰ পৰা শিলচৰলৈ বুলি কাঞ্চনজংঘা এক্সপ্ৰেছত আহি আছিল ৷ মাজনিশা যেতিয়া যুৱতীগৰাকী গভীৰ নিদ্ৰাত পৰিছিল,তেতিয়া আন্ধাৰৰ সুযোগ লৈ নিচাগ্ৰস্ত অভিজিৎ ৰাউতে যুৱতীগৰাকীৰ সৈতে অপকৰ্ম কৰাৰ চেষ্টা কৰে ৷
টোপনিত থকাৰ সুযোগতে যুৱতীগৰাকীৰ আপত্তিজনক স্থান স্পৰ্শ কৰে। এনে অৱস্থাতে যুৱতীগৰাকীয়ে সাৰ পাই হাতে-লোটে ধৰে লম্পট প্ৰকৃতিৰ ৰাউতক ৷ ইয়াৰ পিছতে যুৱতীগৰাকীৰ চিঞৰত দৌৰি আহে আন যাত্ৰীসকল আৰু ধৃত লোকজনক আটক কৰে।
উল্লেখ্য যে ঘটনাৰ পিছতে ভুক্তভোগী যুৱতীগৰাকীয়ে নিশা ফেইচবুক লাইভ কৰি সকলো ঘটনাৰ বৰ্ণনা কৰিছে। আলিপুৰদুৱাৰ-ৰঙিয়াৰ মাজৰ এঠাইত ঘটনাটো সংঘটিত হৈছে বুলি উল্লেখ ৷ এই ঘটনাৰ পিছতে মাজনিশাই ৰঙিয়া ৰেল আৰক্ষীৰ হাতত গতাই দিয়া হৈছে ধৃত ৰাউতক ৷
আনহাতে যুৱতীগৰাকীৰ অভিযোগ মতে আলিপুৰদুৱাৰ ষ্টেচনৰ পৰা ৰে'লত উঠিছিল ধৃত ব্যক্তিজন ৷ লামডিং যোৱাৰ উদ্দেশ্যে উঠিছিল ব্যক্তিগৰাকী ৷ অভিযোগ অনুসৰি টিকটবিহীনভাৱে যাত্ৰা কৰিছিল ধৃত ব্যক্তিগৰাকী। আনকি যাত্ৰাৰ সময়তে তেওঁ সুৰাপান কৰা বুলি ভুক্তভোগী যুৱতীগৰাকীয়ে উল্লেখ কৰে ৷
ইফালে এই ঘটনাৰ পাছত ৰে'লত মহিলা যাত্ৰীসকলৰ নিৰাপত্তাক লৈয়ো প্ৰশ্ন উত্থাপিত হৈছে ৷