NIT ৰ প্ৰাক্তন বাংলাদেশী ছাত্ৰৰ বিস্ফোৰক ফেচবুক পোষ্ট

ডিজিটেল সংবাদ, শিলচৰঃ ভাৰতীয় সকলক কুকুৰ লগত তুলনা কৰি নিজ ফেছবুকত এক ভাৰত বিদ্বেষী পোষ্ট কৰিলে শিলচৰ এনআইটিৰ এগৰাকী প্ৰাক্তন ছাত্ৰই। ছাত্ৰগৰাকীৰ নাম শাহাদত হুছেইন আলপি। জানিব পৰামতে ছাত্ৰগৰাকীৰ ঘৰ বাংলাদেশৰ ঢাকাত।

বাংলাদেশী এই ছাত্ৰগৰাকীৰ ভাৰত বিদ্বেষী এই পোষ্ট ছ’ছিয়েল মিডিয়াত ভাইৰেল হোৱাৰ পাছত শিলচৰ এন আই টি সহ সমগ্ৰ বৰাক উপত্যকাত যথেষ্ট প্ৰতিক্ৰিয়াৰ সৃষ্টি হৈছে। জানিব পৰা মতে, বাংলাদেশৰ বাসিন্দা শাহাদত হুছেইন আলপি শিলচৰ এন আই টিৰ এগৰাকী প্ৰাক্তন ছাত্ৰ । দুমাহ পূৰ্বে তেওঁ এন আই টিৰ পৰা উত্তীৰ্ণ হৈ বৰ্তমানে তেওঁ বাংলাদেশত আছে।

দেওবাৰে এই বাংলাদেশী ছাত্ৰগৰাকীয়ে নিজ ফেছবুকত  “DOGS AND INDIANS ARE NOT ALLOWED” লিখা ভাৰত বিদ্বেষী এক পোষ্ট শ্বেয়াৰ কৰিছিল। আৰু ছাত্ৰগৰাকীৰ এই পোষ্ট লৈ বৰ্তমান শিলচৰ এন আই টিসহ সমগ্ৰ বৰাক উপত্যকাত তীব্ৰ প্ৰতিক্ৰিয়া সৃষ্টি হৈছে। দীৰ্ঘদিন ভাৰতত থাকি, শিলচৰ NITৰ দৰে ভাৰতৰ আগশাৰীৰ এখন শিক্ষানুষ্ঠানত পঢ়াশুনা কৰি বাংলাদেশী ছাত্ৰগৰাকীৰ এনে ভাৰত বিদ্বেষী মনোভাৱ মানি ল'ব পৰা নাই ভাৰতীয়সকলে।

সেয়াহে শাহাদত হুছেইন নামৰ শিলচৰৰ প্ৰাক্তন বাংলাদেশী ছাত্ৰগৰাকীৰ বিৰুদ্ধে  ব্যবস্থা গ্ৰহণৰ বাবে দাবী জনাই শিলচৰ গুংগুৰ আৰক্ষী চকীত বজৰং দলৰ সদস্য সকলে এক গোচৰ ৰুজু কৰিছে ৷