ডিজিটেল সংবাদ,শিলচৰ: প্ৰাৰ্থীত্বক কেন্দ কৰি ধলাই বিজেপিত উলম্ব বিভাজন। অমিয় কান্তি দাসক দলীয় প্ৰাৰ্থীত্ব নিদি বহিৰাগত নিহাৰ ৰঞ্জন দাসক বিজেপিৰ প্ৰাৰ্থীত্ব দিয়াৰ প্ৰতিবাদত দেওবাৰে ৩ শতাধিক বিজেপি কৰ্মীয়ে দলৰ পৰা পদত্যাগ কৰে। অমিয় কান্তি দাসৰ উপস্থিতিত নতুন বজাৰত আয়োজিত এক সভাত সামূহিকভাবে পদত্যাগ কৰে বিজেপি কৰ্মী সকলে।
কেৱল পদত্যাগ কৰাই নহয়,প্ৰাৰ্থীত্ব লাভৰ পৰা বঞ্চিত অমিয় কান্তি দাসক নিৰ্দলীয় প্ৰাৰ্থী হিচাপে প্ৰক্ষেপ কৰি বিজেপি প্ৰাৰ্থী নিহাৰ ৰঞ্জন দাস আৰু সাংসদ পৰিমল শুক্লবৈদ্যক এশিকনি দিবলৈ সাজু হৈছে ধলাই বিজেপিৰ একাংশ লোক। নিহাৰ ৰঞ্জন দাসক ধলাইত নালাগে,বহিৰাগত হটাও, ধলাই বাচাও,পৰিমল শুক্লবৈদ্যৰ এই সিদ্ধান্ত নামানো আদি শ্লোগানেৰে একাংশই ধলাইৰ পৰিবেশ উত্তাল কৰি তোলে।
