শিৱসাগৰত অঘটনঃ বিদ্যুতপৃষ্ঠ হৈ মৰিগাঁৱৰ ঠিকাদাৰৰ মৃত্যু...

ডিজিটেল সংবাদ শিৱসাগৰঃ শিৱসাগৰত আজি নিচেই পুৱাতে বিদ্যুৎপৃষ্ঠ হৈ এজন ব্যক্তি থিতাতে মৃত্যু মুখত পৰে ৷ এই ব্যক্তিগৰাকীৰ নাম ফইজুল আলী ৷ প্ৰায় ৫০ বছৰীয়া ফইজুল আলীৰ প্ৰকৃত ঘৰ মৰিগাঁও জিলাৰ মিকিৰিগাঁৱত ৷

যোৱা কেইবাটাও দশক ধৰি এই ব্যক্তিগৰাকীয়ে শিৱসাগৰ চহৰৰ ধাইআলি চুকৰগাঁও অঞ্চলৰ ভাৰাঘৰত থাকি পকীঘৰৰ ধালা ঠিকাদাৰ হিচাপে জীৱন নিৰ্বাহ কৰিছিল ৷ তেওঁৰ অধীনত দৈনিক অতিকমেও ৭০ জন শ্ৰমিকে কাম কৰি পেট প্ৰবৰ্তন কৰিছিল ৷

আজি শিৱসাগৰৰ দিখৌ দলঙৰ সমীপৰ আমগুৰি গাঁৱত এটা পকীঘৰৰ চাদ ধালাই দিয়াৰ ঠিকা তেওঁ লৈছিল ৷ সেই মৰ্মে আজি পুৱা ফইজুলে একাংশ শ্ৰমিকৰ লগত ধালাই মেচিন আৰু লিফ্ট লগোৱাৰ বাবে চেষ্টা চলায় ৷

সেই সময়ত সংশ্লিষ্ট স্থানত পৰি থকা এডাল কেবোল আঁতৰাই দিয়াৰ বাবে চেষ্টা চলোৱাৰ সময়তে তেওঁ বিদ্যুৎপৃষ্ট হৈ মৃত্যুৰ মুখত পৰে ৷ ততাতৈয়াকৈ তেওঁক এখন নাৰ্ছিং হোমলৈ নিয়া হয় যদিও চিকিৎসকে তেওঁক মৃত বুলি ঘোষণা কৰে ৷ মৃত্যুৰ সময়ত তেওঁ পত্নীৰ উপৰি চাৰি সন্তান আৰু ভাতৃক ইহ সংসাৰত এৰিথৈ যায় ৷

Also Read: ফ্লাই অভাৰখন ভাগিল !