শিৱসাগৰত চলন্ত অৱস্থাত জলিল ইণ্ডিগ': কথমপি ৰক্ষা গৰাকীৰ...

ডিজিটেল সংবাদ শিৱসাগৰঃ সদা ব্যস্ত শিৱসাগৰ চহৰৰ কেন্দ্ৰীয় বজাৰ (চেন্ট্ৰেল মাৰ্কেট) ৰ সন্মুখত মঙ্গলবাৰে নিশা ৮-৩০ বজাত হঠাৎ চলন্ত অৱস্থাত এখন ইণ্ডিগ' বাহন দপদপাই জ্বলি উঠাৰ ঘটনাই সমগ্ৰ চহৰখনতেই তীব্ৰ আতংকময় পৰিৱেশৰ সৃষ্টি কৰে ৷ অৱশ্যে স্থানীয় ৰাইজ আৰু অগ্নিনিৰ্বাপক বাহিনীৰ তৎপৰতাত জুই নিয়ন্ত্ৰণ হয় যদিও বাহনখনৰ বিস্তৰ ক্ষতি হয় ৷

প্ৰাপ্ত বাতৰি মতে চহৰৰ ধাই আলিৰ আনোৱাৰ হুছেইন নামৰ ব্যক্তিগৰাকীয়ে নিজৰ এ এচ ০৪ পি, ০০৭৩ নম্বৰৰ বগা ইণ্ডিগ' বাহনখন লৈ কেন্দ্ৰীয় বজাৰত সামগ্ৰী ক্ৰয় কৰি নিশা প্ৰায় ৮-৩০ বজাত গাড়ীখন লৈ কেন্দ্ৰীয় বজাৰৰ সন্মুখৰ জে পি আগৰৱালা পথ হৈ এলাহাবাদ বেংকৰ সমীপত পোৱাৰ সময়তেই গাড়ীৰ সন্মুখত ধোঁৱা দেখি গাড়ীখন পথৰ মাজত ৰাখি নামি যায় ৷

ইতিমধ্যে প্ৰচণ্ড ধোঁৱাই আগুৰি ধৰা বাহনখন জলন্ত অগ্নিপিণ্ডত পৰিণত হয় ৷ লগে লগেই ব্যস্ত পথৰ ওপৰত দপদপকৈ গাড়ী খন জ্বলি উঠা প্ৰত্যক্ষ কৰি একাংশ লোকে অগ্নিনিৰ্বাপক বাহিনীক খবৰ দিয়াৰ লগতে সকলোৱে হাতে কামে জুই নুমুৱাত নামি পৰে ৷

ইফালে এন খবৰ লাভ কৰি তৎমুহূৰ্ততে ঘটনাস্থলীত উপস্থিত হোৱা ৰাজ্যিক অগ্নিনিৰ্বাপক বাহিনীৰ দুখনকৈ বাহনে অতি তৎপৰতাৰে জুই নুমুৱাবলৈ সক্ষম হয় ৷ অগ্নিকাণ্ডৰ ফলত ইণ্ডিগ' বাহন খনৰ বিস্তৰ ক্ষতি সাধন হয় ৷

Also Read: কাজিৰঙাত প্ৰয়াত শিক্ষকক সোঁৱৰণ প্ৰাক্তন শিক্ষাৰ্থী, সাংবাদিক-দল সংগঠনৰ...