শিৱসাগৰত চাঞ্চল্যকৰ ঘটনাঃ ১২বছৰীয়া শিশুক অপহৰণ...

ডিজিটেল সংবাদ, শিৱসাগৰঃ  শিৱসাগৰত শিশু দিৱসৰ দিনাই শিশু অপহৰণ কৰা ঘটনাই চাঞ্চল্যৰ সৃষ্টি কৰিছে ৷ শিৱসাগৰ চহৰৰ সমীপতেই নিজ গৃহৰ পৰাই ১২ বছৰীয়া শিশুক অপহৰণ কৰি নিলে ৷ এই ঘটনা সংঘটিত হৈছে শিৱসাগৰ চহৰৰ সমীপৰ  ঢুলীয়াপাৰৰ মৌপিয়া গাঁৱত ৷

মৌপিয়া গাঁৱৰ  ১২ বছৰীয়া শিশুক এজন যুৱকে কালি সন্ধিয়া কৌশলেৰে অপহৰণ কৰি নিছিল ৷বুধবাৰে গধুলি অপহৰণৰ লগত জড়িত যুৱকজনৰ জিম্মাৰ পৰা শিশুটি পলাই ৰংঘৰ  চাৰিআলিত উপস্থিত হয়হি ৷ পৰিয়ালৰ লোকে স্থানীয় ৰাইজৰ সহযোগত অপহৰণ কাৰ্য্যৰ মূল অভিযুক্ত ৰিংকু আহমেদক কৰায়ত্ব কৰিবলৈ সক্ষম হয় ৷

এই ঘটনাক কেন্দ্ৰ কৰি উত্তপ্ত পৰিস্থিতিৰ সৃষ্টি হয়।  ৰাইজে ৰিংকু আহমেদক উত্তম মাধ্যম দি জয়সাগৰ আৰক্ষীক গতাই দিয়ে  ৷ পৰিয়ালৰ লোকে কালি নিশাই ঘটনাৰ সম্পৰ্কত দাখিল কৰিছিল এজাহাৰ ৷