![চাৰিগাঁও যুৱক সংঘৰ উদ্যোগত অভিনেতা দীপাংকৰ শইকীয়াৰ স্মৃতিত স্মৃতিচাৰণ সভা](http://media.assettype.com/asomiyapratidin%2F2024-03%2Fbfdfc996-6eaa-4e2b-a0be-d33df45e3833%2F49.jpg?w=480&auto=format%2Ccompress&fit=max)
ডিজিটেল সংবাদ,জামুগুৰিহাট : জামুগুৰিহাটৰ গেৰেকীচুকৰ চাৰিগাঁও যুৱক সংঘৰ উদ্যোগত মঙলবাৰে যুৱ সমাজকৰ্মী, সুদক্ষ অভিনেতা ভাওনা শিল্পী প্ৰয়াত দীপাংকৰ শইকীয়াৰ স্মৃতিত অনুষ্ঠিত হয় এক স্মৃতিচাৰণ সভা ৷ প্ৰয়াত সমাজকৰ্মীগৰাকীৰ বাসগৃহত অনুষ্ঠিত এই স্মৃতিচাৰণ সভাত অভিনেতাগৰাকীৰ জীৱন দৰ্শন তথা কৰ্মৰাজীৰ ওপৰত “স্মৃতিৰ সফুৰা”নামেৰে এখনি গ্ৰন্থও উন্মোচন কৰা হয় ৷
স্মৃতি গ্ৰন্থখনিৰ শুভ উন্মোচন কৰে নদুৱাৰ প্ৰেছ ক্লাৱৰ মুখ্য সম্পাদক ফণীন্দ্ৰ বৰুৱাই ৷ বিশিষ্ট সমাজকৰ্মী গিৰিশ বৰাৰ সঞ্চালনাত অনুষ্ঠিত স্মৃতিচাৰণ সভাখনিত দীপাংকৰ শইকীয়াৰ নাট্য কৰ্ম আৰু ভাওনা শিল্পৰ ওপৰত আলোকপাত কৰে বিভিন্নজনে ৷
স্মৃতিচাৰণ সভাখনিত অঞ্চলটোৰ দুই শতাধিক ৰাইজে অংশগ্ৰহণ কৰে ৷ উল্লেখ্য যে যোৱা ১১ ফেব্ৰুৱাৰীত জামুগুৰিহাটৰ গেৰেকীচুক গাঁও নিৱাসী যুৱ সমাজকৰ্মী,সুদক্ষ অভিনেতা তথা ভাওনা শিল্পী দীপাংকৰ শইকীয়াৰ ৫৩ বছৰ বয়সত অকাল বিয়োগ ঘটিছিল ৷