জামুগুৰিহাটত নদুৱাৰ মণ্ডল বিজেপিৰ কাৰ্যালয়ৰ শুভ উদ্ধোধন...

ডিজিটেল সংবাদ, জামুগুৰিহাটঃ চতিয়া সমষ্টিৰ অন্তৰ্গত নদুৱাৰ মণ্ডল বিজেপিৰ নৱনিৰ্মিত এটি কাৰ্যালয়ৰ দেওবাৰে সন্ধিয়া শুভ উদ্ধোধন কৰে চতিয়া সমষ্টিৰ বিধায়ক পদ্ম হাজৰিকাই ৷ জামুগুৰিহাটৰ মূল ব্যৱসায় কেন্দ্ৰত মণ্ডল বিজেপিৰ কাৰ্যালয়টি শুভ উদ্ধোধন কৰি বিধায়ক গৰাকীয়ে কয় যে- 'এই কাৰ্যালয়ৰ জৰিয়তে ভাৰতীয় জনতা পাৰ্টীৰ সংগঠন শক্তিশালী হ'ব ৷ চৰকাৰখনৰ সকলো উন্নয়নমূলক আচঁনি দলৰ তৃণমূল পৰ্যায়লৈকে লৈ যোৱাৰ সুবিধা হ'ব৷'

তদুপৰি তেওঁ বিগত কেইটামান দিন ধৰি জামুগুৰিহাটত তেওঁৰ বিৰুদ্ধে অনা অভিযোগৰ ওপৰতে মত ব্যক্ত কৰে। তেওঁ কয়, 'এটা দুষ্ট চক্ৰই সামাজিক মাধ্যমত মোৰ বিৰুদ্ধে অপপ্ৰচাৰত জড়িত হৈ অহাৰ লগতে দলকো আক্ৰমণৰ লক্ষ্য কৰি আহিছে ৷ সেই সকলক মই এই মঞ্চৰ পৰাই সাৱধান কৰি দিছো ৷ জামুগুৰিহাটৰ উন্নয়নত ব্যাঘাত জন্মা কোনো কথা-কামত যাতে তেওঁলোক জড়িত নহয় তাৰ বাবে সকীয়াই দিছো ৷'

লগতে তেওঁ বিজেপি চৰকাৰৰ দিনত চতিয়া সমষ্টিত সৰ্বত্ৰে উন্নয়ন হোৱা বুলি মন্তব্য কৰে। চতিয়া সমষ্টিৰ উন্নয়নত সমষ্টিবাসী ৰাইজ সন্তুষ্ট হৈছে আৰু অহা নিৰ্ববাচনত ১ লাখতকৈয়ো অধিক ভোটত জয়ী হ'ম বুলিও মত প্ৰকাশ বিধায়কগৰাকীৰ৷

Also Read: নগাঁৱৰ ৰূপহীহাটত গুলীচালনাঃ আটক ৪ ডকাইত...