নীট (NEET) পৰীক্ষাত উজ্বলিল দিকৰাই চাহ বাগিছাৰ দৰিদ্ৰ ছাত্ৰ যটিন তাঁতি

ডিজিটেল সংবাদ, জামুগুৰিহাটঃ সদ্য ঘোষিত নীট(NEET) পৰীক্ষাৰ ফলাফলত উজ্বলিল দিকৰাই চাহ বাগিছাৰ দৰিদ্ৰ পৰিয়ালৰ মেধাবী ছাত্ৰ যটিন তাঁতি ৷ কৃতী ছাত্ৰ যটিন তাঁতিয়ে সৰ্ব ভাৰতীয় নীট (NEET) পৰীক্ষাত মুঠ ৫২৭ নম্বৰ লাভ কৰি সফলতাৰে উত্তীৰ্ণ হৈ অঞ্চলটোলৈ গৌৰৱ কঢ়িয়াই আনিছে।

৫ মে'ত অনুষ্ঠিত নীট পৰীক্ষাৰ ফলাফল লাভ কৰি কৃতী ছাত্ৰ গৰকীৰ লগতে পিতৃ মাতৃ ও পৰিয়ালবৰ্গ আনন্দত আত্মহাৰা হৈ পৰিছে ৷ নদুৱাৰ অঞ্চলৰ দিকৰাই চাহ বাগিছা খনৰ অতি দৰিদ্ৰ পৰিয়ালৰ মেধাৱী ছাত্ৰ গৰাকীয়ে বিগত বৰ্ষৰ নীট (NEET) পৰীক্ষাত অৱতীৰ্ণ হৈ লাভ কৰিছিল ৩৩০ নম্বৰ৷ ভৱিষ্যতে এজন সু চিকিৎসক হোৱাৰ সপোন পুহি ৰখা মেধাৱী ছাত্ৰ যটিন তাঁতিয়ে ইয়াৰ পিছতো হাৰ নামানি শিক্ষাৰ ক্ষেত্ৰত দৰিদ্ৰতা কেতিয়াও হেঙাৰ হব নোৱাৰে তাকেই যেন প্ৰমাণ কৰি দেখুৱালে ৷

দীৰ্ঘ দিন ধৰি একানপতিয়াকৈ দৈনিক ৬ ৰ পৰা ৮ ঘন্টা পৰ্যন্ত পঢ়াশুনাতে আত্মনিয়োগ কৰি থাকি মনৰ দৃঢ়তা আৰু একাগ্ৰতাক মূলধন হিচাবে লৈ পুনৰ নীট(NEET) পৰীক্ষাত অৱতীৰ্ণ হৈ ৫২৭ নম্বৰ লাভ কৰি সফলতাৰ পাবলৈ সক্ষম হ'ল ৷ ছাত্ৰজনৰ এই সফলতাত অঞ্চলটোৰ বিভিন্ন অনুষ্ঠান প্ৰতিষ্ঠান ব্যক্তি বিশেষে অভিনন্দন ও আন্তৰিক শুভেচ্ছা জ্ঞাপন কৰি উজ্জ্বল ভৱিষ্যত কামনাৰে প্ৰাৰ্থনা জনাইছে। উল্লেখযোগ্য যে যটিন তাঁতি দিকৰাই চাহ বাগিছা নিবাসী চাহ শ্ৰমিক ৰাম দাস তাঁতি আৰু ববি তাঁতিৰ সুযোগ্য সন্তান ।

Also Read: অসম আন্দোলনৰ নেত্ৰী জয়মতী কলিতাৰ বিয়োগ...