![জামুগুৰিহাটত সুদখোৰৰ অতপালি](http://media.assettype.com/asomiyapratidin%2F2024-02%2Fc0fdb7a0-368c-424c-bb54-85fc0a50c6b2%2F302.jpg?w=480&auto=format%2Ccompress&fit=max)
ডিজিটেল সংবাদ,জামুগুৰিহাট : ৰাজ্যৰ বিভিন্ন প্ৰান্তত সুদখোৰৰ বিৰুদ্ধে আৰক্ষীয়ে অভিযান তীব্ৰতৰ কৰি তুলিছে যদিও জামুগুৰিহাটত এতিয়াও আৰক্ষীৰ নাকৰ তলৰে টিঘিলঘিলাই ফুৰিছে একাংশ সুদখোৰ ৷ এইসকল সুদখোৰক জামুগুৰি তথা শোণিতপুৰ জিলা প্ৰশাসনে এতিয়াও গ্ৰেপ্তাৰ নকৰাতো আশ্চৰ্যজনক কথা হিচাপে চৰ্চিত হৈছে ৷
জামুগুৰিহাট,কুসুমটোলা আৰু ধলাইবিল অঞ্চলত এতিয়া কুৰিৰো অধিক সুদখোৰে তেওঁলোকৰ ব্যৱসায় অব্যাহত ৰাখিছে ৷ এইসকল সুদখোৰে দুখীয়া দৰিদ্ৰৰ তেজ শুহি খাইছে ৷ টকা সুদত দিয়াৰ বিনিময়ত কাঢ়ি লৈছে সোণৰ গহনা,এটিএম কাৰ্ড,স্কুটি মটৰচাইকেলপৰ্যন্ত ৷
টকা ধাৰ মাৰিব নোৱাৰি আত্মহননৰ পথ বাছি লোৱাৰ লগতে বহু পৰিয়াল সৰ্বস্বান্ত হোৱাও পৰিলক্ষিত হৈছে ৷ সেয়ে এইসকলক শীঘ্ৰে গ্ৰেপ্তাৰ কৰি দৃষ্টান্তমূলক শাস্তিৰ দাবী কৰিছে অসম জাতীয়তাবাদী যুৱ ছাত্ৰ পৰিষদৰ জামুগুৰি আঞ্চলিক সমিতিৰ সভাপতি প্ৰাঞ্জল বৰাই ৷