ৰাহুল গান্ধী হ'ল কাল, নহ'লে ২০১৪ তেই ফুলিছিল কপাল

- মৃদুল কুমাৰ সন্দিকৈ

কংগ্ৰেছত থাকোতেই হিমন্ত বিশ্ব শৰ্মা মুখ্যমন্ত্ৰী হোৱাতো প্ৰায় নিশ্চিত হৈছিল । সেউজ সংকেত দিছিল কংগ্ৰেছৰ তেতিয়াৰ অধ্যক্ষ ছোনিয়া গান্ধীয়ে । আজিৰ পৰা প্ৰায় ৯ বছৰ আগৰ কথা এইয়া । মাজত মাত্ৰ এটা নিশা । দিল্লীৰ পৰা ঘূৰি আহি মুখ্যমন্ত্ৰীৰূপে শপত ল'ব হিমন্ত বিশ্ব শৰ্মাই । শৰ্মাৰ এই আশাত চেচাপানী ঢালিছিল ৰাহুল গান্ধীয়ে । শনি হৈ পৰিছিল ৰাহুল গান্ধী হিমন্ত বিশ্ব শৰ্মাৰ বাবে ।

এই আঁৰৰ কাহিনী এতিয়া পোহৰলৈ আহিছে । দেশৰে এগৰাকী প্ৰতিষ্ঠিত সাংবাদিক বৰ্ষাৰ দত্তক এক সাক্ষাৎকাৰ দিছিল কংগ্ৰেছ এৰা একালৰ জ্যেষ্ঠ কংগ্ৰেছী নেতা গোলাম নবী আজাদে । সেই সাক্ষাৎতেই হিমন্ত বিশ্ব শৰ্মাৰ এই অধ্যায় খুলি দিছে তেওঁ । দিল্লীত বৰ বিশেষ কাম নথকাত তেওঁ এসপ্তাহমান কটাবৰ বাবে গৈছিল শ্ৰীনগৰলৈ । আগদিনা তেওঁ গৈ শ্ৰীনগৰ পাইছেগৈ । হঠাৎ তেওঁৰ লেণ্ডলাইন ফোনত ছোনিয়া গান্ধীৰ ৰাজনৈতিক সচিব আহমেদ পেটেলে ফোন কৰিছিল । সুধিছিল ক'ত আছে তেওঁ ।

তেওঁক বিচাৰি ফুৰা বুলি কৈ তৎক্ষণাৎ দিল্লীলৈ জৰুৰীভাৱে ঘূৰি আহিব কৈছিল । কথা পাতিছিল ছোনিয়া গান্ধীয়ে । জনাইছিল অসমত কিবা এটা ৰাজনৈতিক সংকট হৈছে । সেই সংকটৰ নিৰাময় কৰিব লাগে তেওঁ । খবৰ লৈ গম পাইছে তেতিয়াৰ তৰুণ গগৈ চৰকাৰৰ স্বাস্থ্যমন্ত্ৰী হিমন্ত বিশ্ব শৰ্মা তেওঁৰ ঘনিষ্ঠ ।

একেদৰে অসমৰ তেতিয়াৰ ৰাজ্যপাল জানকীবল্লভ পাটনায়কৰ লগতো আজাদৰ যে ভাল সেই কথা কংগ্ৰেছ হাইকামাণ্ডে গম পাইছে । যদি আহিবলৈ বিমান নাই তেনেহ'লে এখন বিমান পঠাই দিব । যিকোনো পৰিস্থিতিতেই তেওঁক দিল্লীলৈ উভতি আহি সন্ধিয়া ৫ বজাত হাই কামাণ্ডে আয়োজন কৰা জৰুৰী বৈঠকত অংশ ল'বলৈ কোৱা হৈছিল ।

সেইমতে শ্ৰীনগৰৰ পৰা দিল্লীলৈ ঘূৰি আহিছিল সেইদিনা গোলাম নবী আজাদ । দিল্লীলৈ অহাৰ পূৰ্বে হাই কামাণ্ডাৰ নিৰ্দেশ অনুসৰি ইতিমধ্যে পদত্যাগ পত্ৰ দাখিল কৰা হিমন্ত বিশ্ব শৰ্মা আৰু অসমৰ তেতিয়াৰ ৰাজ্যপাল জে বি পাটনায়কৰ সৈতে বিষয়টো খৰখেদা নকৰিবলৈ তেওঁ কথা পাতিছিল ।

৫ বজাত হাই কামাণ্ডক আজাদে তেতিয়া অসমৰ পৰ্যৱেক্ষকৰ দায়িত্বত থকা এ আই চি চিৰ সাধাৰণ সম্পাদক চি পি যোশীৰ সৈতে ছোনিয়া গান্ধীক সাক্ষাৎ কৰিছিলগৈ । এই সংকট মোচনৰ বাবে পিছদিনাই আজাদক গুৱাহাটীলৈ যোৱাৰ নিৰ্দেশ দিছিল গান্ধীয়ে ।

আজাদে গান্ধীক কৈছিল একো এটা সিদ্ধান্ত ল'ব নোৱাৰাকৈ গুৱাহাটীলৈ তেওঁ নাযায় । কোন মুখ্যমন্ত্ৰী হ'ব সেই সিদ্ধান্ত লৈ যাব লাগিব । এইখিনি অনুশীলন ইয়াতে কৰি এটা সিদ্ধান্ত লৈহে তেওঁ অসমলৈ যোৱাতো ভাল বুলি জনাইছিল ছোনিয়া গান্ধীক ।

সাক্ষাৎকাৰটোত আজাদে কোৱা মতে গান্ধীৰ সৈতে এই বৈঠকৰ পাছতে তেওঁ হিমন্ত বিশ্ব শৰ্মালৈ ফোন কৰিছিল । ফোনত তেওঁৰ সমৰ্থনত থকা বিধায়কসকলক লৈ পিছদিনাই দিল্লীলৈ মাতি পঠিয়াইছিল । অৱশ্যে এইটোও সতৰ্ক কৰি দিছিল যে সংবাদ মাধ্যম বা কোনোৱে যাতে এই কথাটো গম নাপাই । বিধায়কসকলক বেলেগ বেলেগ লক্ষ্যস্থানলৈ যাও বুলিও ক'বলৈ কোৱা হৈছিল ।

তাৰ পাছতে ফোন কৰিছিল তৰুণ গগৈলৈ । তেওকো তেওঁৰ সমৰ্থনত থকা বিধায়কক দিল্লীলৈ পঠিয়াবলৈ কৈছিল আজাদে । পিছদিনা আজাদৰ বাসভৱনত হিমন্ত বিশ্ব শৰ্মাৰ নেতৃত্বত অসমৰ বিধায়কৰ এটা দল উপস্থিত হৈছিল । ৫০ খন চকীৰ ব্যৱস্থা কৰিব লগীয়া হৈছিল আজাদে । কাৰণ হিমন্ত বিশ্ব শৰ্মাৰ পক্ষত ৪৫ জন বিধায়ক আছিল । ইয়াৰ বিপৰীতে গগৈৰ সমৰ্থনত ৭ জন আৰু বাকী যি ১০-১২ জন আছিল তেওঁলোকে হাই কামাণ্ডে দিয়া সিদ্ধান্ত মানি ল'ব বুলি জনাইছিল ।

ছোনিয়া গান্ধীক এই কথা কৈছিল গৈ গোলাম নবী আজাদে । জনাইছিল হিমন্ত বিশ্ব শৰ্মাৰ পক্ষতে গৰিষ্ঠ সংখ্যক বিধায়ক আছে । হিমন্ত বিশ্ব শৰ্মাক মুখ্যমন্ত্ৰী পতাৰ সেউজ সংকেত দি দিছিল ছোনিয়া গান্ধীয়ে । ইতিমধ্যে দুটা দিন দিল্লীত কটাইছিল সেই বিধায়ক সকলে । পিছদিনা পুৱা তেওলোক গুৱাহাটীলৈ উভতি অহাৰ কথা । মুখ্যমন্ত্ৰী ৰূপে শপত ল'ব হিমন্ত বিশ্ব শৰ্মাই ।

কাৰ পক্ষত কিমান বিধায়ক আছে কাৰ পেৰেড হ'ব এইবোৰ পৰিকল্পনা হৈ গৈছিল । সেইদিনাই নিশা ৮-৯ মান বজাত এটা ফোন আহিছিল গোলাম নবী আজাদলৈ । ৰাহুল গান্ধীয়ে কৰিছিল ফোন । সুধিছিল - অসমত বোলে মুখ্যমন্ত্ৰী সলনি কৰিবলৈ গৈ আছে তেওলোকে ? আজাদে হয় বুলি সকলোখিনি কৈছিল । ৰাহুল গান্ধীয়ে নিৰ্দেশ দিছিল এইটো হ'ব নোৱাৰে । গুৱাহাটীলৈ তেওঁলোক যোৱাতো বাধা আৰোপ কৰিছিল ।

পিছদিনা ১০ বজাত চি পি যোশী আৰু তেওক সাক্ষাৎ কৰিবলৈ বাসগৃহলৈ মাতিছিল । ফোনতে ৰাহুল গান্ধীক আজাদে বুজাইছিল যদি এইয়া কৰা নহয় তেনেহ'লে কংগ্ৰেছ এৰিব হিমন্তই । দলৰ ক্ষতি হ'ব । ৰাহুল গান্ধীয়ে আজাদৰ কোনো যুক্তিয়েই মানি ল'ব খোজা নাছিল । মাত্ৰ কঠোৰ ভাষাৰে উত্তৰ দিছিল "যায় যদি যাবলৈ দিয়ক, আৰ এচ এচত যোগদান কৰক "

পিছদিনা যেতিয়া ৰাহুল গান্ধীৰ ঘৰলৈ আজাদ আৰু যোশী গৈছিল তেতিয়া তৰুণ গগৈ আৰু গৌৰৱ গগৈয়ে তেওঁৰ সৈতে চাহ খাই আছিল । এনেকৈয়ে কংগ্ৰেছত থাকোতে মুখ্যমন্ত্ৰী হও-হওকৈ হোৱাৰ সুযোগ পোৱা নাছিল হিমন্ত বিশ্ব শৰ্মাই । ৰাহুল গান্ধীৰ বাধাৰ বাবেই বিসম্বাদ কৰিও, ৪৫ জন বিধায়ক লগত থকাৰ পাছতো মুখ্যমন্ত্ৰী হ'ব নোৱাৰিলে তেওঁ ।

এইয়া অসমৰ ৰাজনীতিৰ এক গুৰুত্বপূৰ্ণ ইতিহাস । এসময়ত হিমন্ত বিশ্ব শৰ্মা, তৰুণ গগৈৰ ব্লু আইড বয় আছিল । কেতিয়া কেনেকৈ দুয়োৰে মাজত এই সংঘাতে গা কৰি উঠিলে সেইয়া আন এক অধ্যায় ।

২০১২ চনৰ পৰা ২০১৪ চনলৈকে এক জটিল আৰু সংঘাতময় সময় আছিল অসমৰ ৰাজনীতিত । ২০১১ চনত তৰুণ গগৈয়ে তৃতীয়বাৰৰ বাবে মুখ্যমন্ত্ৰী হিচাপে দায়িত্ব গ্ৰহণ কৰিছিল । ২০১৩ত সংবাদ মাধ্যমত কিছু খবৰ বিয়পিছিল । সেই খবৰবোৰ আছিল তৰুণ গগৈক অপসাৰণ কৰিব কংগ্ৰেছ হাইকামাণ্ডে ।

মুখ্যমন্ত্ৰী গগৈ তেতিয়া বিদেশ ভ্ৰমণত । অসমত প্ৰৱল বান । প্ৰধানমন্ত্ৰী ড০ মনমোহন সিঙে পৰিস্থিতিৰ বুজ ল'বলৈ ফোন কৰিছিল হিমন্ত বিশ্ব শৰ্মালৈ । সেই কথাটোকো ৰাজনৈতিক ৰহন সানি একাংশ সংবাদ মাধ্যমত প্ৰকাশ কৰা হৈছিল । আনকি ২০১২ চনত অনুষ্ঠিত উপ-ৰাষ্ট্ৰপতি নিৰ্বাচনৰ পূৰ্বে কংগ্ৰেছে তেতিয়াৰ মুখ্যমন্ত্ৰী তৰুণ গগৈক প্ৰাৰ্থী কৰাব বুলি আন এক খবৰ বিয়পি পৰিছিল ।

ইণ্ডিয়ান এক্সপ্ৰেছৰ দৰে কাকতে ২০১৩ত ২১ জানুৱাৰীৰ সংখ্যাত হিমন্ত বিশ্ব শৰ্মা আৰু তৰুণ গগৈৰ সংঘাতক লৈ আন এক খবৰ প্ৰকাশ কৰিছিল । সেই বৰ্ষৰ ১ ফেব্ৰুৱাৰীত মুখ্যমন্ত্ৰীৰ নাম প্ৰকাশ নকৰাকৈ হিমন্ত বিশ্ব শৰ্মাই এক টুইট প্ৰকাশ কৰিছিল । তেওঁ লিখিছিল, "অস্তমিত যাত্ৰাৰ লোক" ।

বাকযুদ্ধ লাহে লাহে তুংগত উঠিছিল দুয়োৰে মাজত । ২০১৩ চনৰ ১৬ জুলাইত তেতিয়াৰ মুখ্যমন্ত্ৰী তৰুণ গগৈয়ে কাৰো নাম নোলোৱাকৈ এটা টুইট কৰিছিল । টুইটটোত তেওঁ লিখিছিল "We are loyal congress workers and we have no personal ambition. Except strengthening the party we need to get 12 out of 14 seats in loksabha polls”

২০১২ ৰ ১৫ আগষ্টত হিমন্ত বিশ্ব শৰ্মাই মুখ্যমন্ত্ৰী তৰুণ গগৈক সাক্ষাতৰ বাবে গৈছিল কিন্তু সাক্ষাৎ নিদিলে গগৈয়ে । তাৰ পাছতে তেওঁ স্বাস্থ্য আৰু শিক্ষাৰ দৰে দুই গুৰুত্বপূৰ্ণ মন্ত্ৰী বিভাগৰ পৰা পদত্যাগ কৰে । কিন্তু ২০১২ৰ ২৪ আগষ্টত দিল্লীৰ পৰা ঘূৰি আহি পোনে পোনে কইনাধৰালৈ গৈ মুখ্যমন্ত্ৰীক সাক্ষাৎ কৰি পদত্যাগ পত্ৰ প্ৰত্যাহাৰ কৰিছিল ।

সেই বিসম্বাদৰ পৰিৱেশৰ মাজত এফাল সংঘাত পৰিহাৰৰ বাবে চেষ্টা চলিছিল আনফালে মুখ্যমন্ত্ৰী আৰু বিসম্বাদী পক্ষই পৰস্পৰে পৰস্পৰক আক্ৰমণ চলাইছিল । তৰুণ গগৈক অপদাৰ্থ মুখ্যমন্ত্ৰী আখ্যা দিছিল বিসম্বাদী পক্ষই । আনহাতে, মুখ্যমন্ত্ৰীয়ে মুকলিকৈ কৈছিল মোক খেদাতো সহজ কথা নহয় ।

২০১৩ৰ শেষৰ ফালে সেই বিসম্বাদ মুকলি বিদ্ৰোহ হৈ পৰিল । ২০১৪ৰ লোকসভা নিৰ্বাচন অনুষ্ঠিত হৈ গ'ল । ১৬ মে'ত ফলাফল ঘোষণা কৰিলে । কংগ্ৰেছৰ অৱস্থা কাঁহিল । বিসম্বাদী পক্ষই ভাবিছিল এইবাৰ মুখ্যমন্ত্ৰী সলনি হ'ব । তাৰ মাজতেই সেই বৰ্ষৰ ২৬ জুনত বি পি এফে এখন জৰুৰী বৈঠক কোকৰাঝাৰত অনুষ্ঠিত কৰি সিদ্ধান্ত ল'লে যে তেওঁলোকৰ ৮ বছৰীয়া মিত্ৰতা শেষ কৰিব ।

মুখ্যমন্ত্ৰীৰ সমৰ্থনত স্বাক্ষৰ অভিযান, আনফালে মুখ্যমন্ত্ৰীৰ বিৰুদ্ধে স্বাক্ষৰ অভিযান চলি গ'ল । ৰাতি কোন বিধায়ক কাৰ ঘৰলৈ গৈছে সেইয়াও খবৰ হৈ পৰিল । ২০১৩ৰ ২ এপ্ৰিলত বৰাকৰ মন্ত্ৰী-বিধায়কেৰে তৰুণ গগৈৰ এখন বৈঠক অনুষ্ঠিত হৈছিল । এই বৈঠকত অংশ লৈছিল মন্ত্ৰী গৌতম ৰয়, মন্ত্ৰী অজিত সিং, ছিদ্দিক আহমেদ, মণিলাল গোৱালা, নীৰজ প্ৰসাদ গোৱালা, ৰুমী নাথ, এনামূল হক. সুস্মিতা দে', জামালুদ্দিন আহমেদ, কমলাক্ষ দে' পুৰকায়স্থয়ে ।

২০১৩ৰ ৩ এপ্ৰিলত তেতিয়াৰ প্ৰদেশ কংগ্ৰেছৰ সভাপতি ভূৱনেশ্বৰ কলিতাই সাংবাদিকক জনাই যে বিসম্বাদ নিয়ন্ত্ৰণ হৈছে । ৪ এপ্ৰিলত দ্বিগবিজয় সিং গুৱাহাটীলৈ আহিল । তেওঁ আহি ঘোষণা কৰিলে গগৈয়ে ঠিকেই চলাই আছে ৰাজ্য । তাৰ পূৰ্বে দ্বিগিজয় সিঙে অসম বিধান সভাৰ বিধায়নী পক্ষত কেইবাজনো বিধায়কৰ মতামত গ্ৰহণ কৰিছিল । লক্ষণীয়ভাৱে সাক্ষাৎ কৰা নাছিল হিমন্ত বিশ্ব শৰ্মাক । শৰ্মাই সেই সন্দৰ্ভত প্ৰতিক্ৰিয়া ব্যক্ত কৰি কৈছিল যিখিনি ক'ব লগীয়া আছিল, দিল্লীত কৈ আহিছো ।

অৱশ্যে সন্ধিয়ালৈ বিসম্বাদী মন্ত্ৰী বিধায়কে গ্ৰীনউড ৰিজৰ্টৰ ২০৬ নং কোঠাত আলোচনাত বহে । এই বৈঠকত উপস্থিত আছিল ৰামেশ্বৰ ধানোৱাৰ, গিৰিন্দ্ৰ মল্লিক. চন্দন সৰকাৰ, ৰাজু চাহু, ইলিয়াজ আলি, আবু তাহেৰ বেপাৰী, ৰূপজ্যোতি কুৰ্মী, বলীন চেতিয়া, জীৱনতাৰা ঘাটোৱা, প্ৰধান বৰুৱা, সুমিত্ৰা পাটিৰ, পীযূষ হাজৰীকা, জয়ন্ত মল্ল বৰুৱা, হেমন্ত তালুকদাৰ, এচ আৰ চুব্বা, জাভেদ ইছলাম, ৰাজেন্দ্ৰ প্ৰসাদ সিং আদি ।

আবেলি ৪.২০ বজাৰ পৰা বহা এই বৈঠকৰ পাছতেই প্ৰদ্যুৎ বৰদলৈ, ৰকিবুল হুছেইন, নিলমণিসেন ডেকা আৰু হিমন্ত বিশ্ব শৰ্মাৰে দ্বিগিজয় সিঙৰ আন এক বৈঠক অনুষ্ঠিত হয় । ৬ এপ্ৰিলত ৰাজীৱ ভৱনত দ্বিগিজয় সিঙে এক সংবাদ মেল সম্বোধন কৰি ঘোষণা কৰে ২০১৬ চনলৈকে অসমত মুখ্যমন্ত্ৰী সলনি নহয় ।

২০১৪ৰ ১৬ মে'ত ঘোষণা কৰা লোকসভা নিৰ্বাচনৰ ফলাফলে বিপদত পেলাইছিল তৰুণ গগৈক । সেই বছৰ ২২ মে'ত ছোনিয়া গান্ধীক সাক্ষাৎ কৰি পৰাজয়ৰ নৈতিক দায়িত্ব স্বীকাৰ কৰি পদত্যাগ পত্ৰ দাখিল কৰিছিল । গগৈৰ পদত্যাগ পত্ৰ গান্ধীয়ে গ্ৰহণ নকৰিলে ।

এইবাৰ বিসম্বাদী পক্ষৰ পৰা ঘোষণা কৰা হ'ল ৰাজভৱন যাত্ৰাৰ কথা । হাই কামাণ্ডৰ এনে স্থিতিত একাংশ বিসম্বাদীয়ে শিবিৰ সলালে । ২০১৪ চনৰ ২১ জুলাইত হিমন্ত বিশ্ব শৰ্মাই ৰাজভৱনলৈ যাব বুলি ঘোষণা কৰি থৈছিল ।

তাৰ আগদিনা বিসম্বাদী বিধায়কসকলৰ সৈতে শৰ্মাৰ বাসভৱনত বৈঠক অনুষ্ঠিত হৈছিল । ২৮ জন বিধায়কক লগত লৈ হিমন্ত বিশ্ব শৰ্মাই ৰাজ্যপাল জানকী বল্লভ পাটনায়কৰ হাতত পদত্যাগ পত্ৰ দাখিল কৰিলে । বিসম্বাদীৰ পক্ষতো ইতিমধ্যে ফাঁট মেলিছে । সেই ৰাজভৱন যাত্ৰাত সং দিয়া বিধায়কসকল আছিল মন্ত্ৰী ডা: অৰ্ধেন্দু কুমাৰ দে', চিদ্দীক আহমেদ, ৰেকিবুদ্দিন আহমেদ, কমলাক্ষ দে' পুৰকায়স্থ, জয়ন্ত মল্ল বৰুৱা, পীযুষ হাজৰিকা, ৰাজেন বৰঠাকুৰ, আবু তাহেৰ বেপাৰী, শিৱচৰণ বসুমতাৰী, হাবুল চক্ৰৱৰ্তী আদি ।

পদত্যাগ পত্ৰ দাখিল কৰাৰ পিছত সেই পত্ৰৰ প্ৰতিলিপি মুখ্যমন্ত্ৰী তৰুণ গগৈলৈ প্ৰেৰণ কৰিছিল । পদত্যাগ কৰি আহি নিজৰ আৱাসত এখন সংবাদ মেল সম্বোধন কৰিছিল হিমন্ত বিশ্ব শৰ্মাই । সেই সংবাদ মেলত তেওঁ মুকলিকৈ কৈছিল "মই ছোনিয়া গান্ধী ডাঙৰীয়ানীক এই কথাটো কৈছিলো যে তৰুণ গগৈ মুখ্যমন্ত্ৰী হৈ থাকিলে আমি লোকসভা নিৰ্বাচনত ভাল ফলাফল নাপাম ।"

এইয়া আছিল হিমন্ত বিশ্ব শৰ্মা আৰু তৰুণ গগৈৰ মাজৰ প্ৰেক্ষাপট । পদত্যাগ কৰাৰ পাছত হিমন্ত বিশ্ব শৰ্মাই এক সাক্ষাৎকাৰ দিছিল এখন ৰাষ্ট্ৰীয় আলোচনীক । ইণ্ডিয়া টুডেক দিয়া সাক্ষাৎকাৰত আন কেইবাটাও গুৰুত্বপূৰ্ণ প্ৰশ্নৰ লগতে কিয় যোৱা ১৩ বছৰে একেলগে কাম কৰা আৰু অতি মধুৰ সম্পৰ্ক থকা তৰুণ গগৈক বিৰোধিতা কৰিলে বুলি সোধা হৈছিল ।

তেতিয়াই এই কথা হিমন্ত বিশ্ব শৰ্মাই কৈছিল ৰাজনৈতিকভাৱে পুত্ৰক প্ৰতিষ্ঠা কৰাৰ প্ৰৱণতাৰ বাবেই তৰুণ গগৈৰ চৰকাৰৰ ওপৰত নিয়ন্ত্ৰণ হেৰাই গ'ল ।

তাৰ পাছত কিছুদিন জিৰণি লৈ ২০১৫ চনৰ ২৩ ‍আগষ্টত বিজেপিত যোগদান কৰিছিল হিমন্ত বিশ্ব শৰ্মাই । ২০১৬ৰ নিৰ্বাচনত তেওঁ মুখ্যমন্ত্ৰী সৰ্বানন্দ সোণোৱাল চৰকাৰৰ দিনত তেওঁ আছিল দুই নম্বৰ স্থানত । ২০২১ চনৰ বিধানসভা নিৰ্বাচনত আকৌ বিজেপি চৰকাৰ গঠন হ'ল । আকৌ দিল্লীত সিদ্ধান্ত ল'ব লগা হ'ল নেতৃত্বই । এইবাৰ নাছিল ৰাহুল গান্ধী । হিমন্ত বিশ্ব শৰ্মাই মুখ্যমন্ত্ৰী হ'ল । ১০ মে' ২০২১ ত শপত ল'লে তেওঁ । এইয়া অতীত, অসমৰ ৰাজনীতিৰ উত্থান-পতনৰ অধ্যায় ।