![কাইলৈৰ পৰা ৰঙিয়াত শ্ৰীমন্ত শঙ্কৰদেৱ সংঘৰ অধিৱেশন](http://media.assettype.com/asomiyapratidin%2F2024-02%2F1f5c4271-0aaf-43b7-a6c5-9544c3cba6b1%2F208.jpg?w=480&auto=format%2Ccompress&fit=max)
ডিজিটেল সংবাদ,ৰঙিয়া : উত্তৰ পূৰ্বাঞ্চলৰ সৰ্ববৃহৎ ধৰ্মীয় অনুষ্ঠান শ্ৰীমন্ত শংকৰদেৱৰ সংঘৰ ৯৩ সংখ্যক অধিৱেশনক কেন্দ্ৰ কৰি হাতীখলা পথাৰত বিৰাজমান হৈছে এক উদূলি-মূদূলি পৰিবেশ। শুকুৰবাৰৰ পৰা ৰঙিয়াৰ মৰণজানাৰ হাতীখলা পথাৰৰ শঙ্কৰদেৱৰ সমন্বয় ক্ষেত্ৰত আৰম্ভ হ'ব শ্ৰীমন্ত শঙ্কৰদেৱ সংঘৰ অধিৱেশন ৷
এই অধিৱেশনস্থলী হাতীখলা পথাৰত বৃহস্পতিবাৰৰ পুৱাৰে পৰা দূৰ-দূৰণিৰ আই মাতৃ বাপ,ভকত বৈষ্ণৱ আহি শিবিৰৰ ভৰি পৰিছে। কাইলৈৰ পৰা তিনিদিনীয়া কাৰ্যসূচীৰে ৰঙিয়াৰ মৰণজানাৰ সমীপৰ হাতীখলা পথাৰত অনুস্থিত হ'ব উত্তৰ পূৰ্বাঞ্চলৰ এক সৰ্ববৃহৎ ধৰ্মীয় অনুষ্ঠান সংঘৰ ৯৩ সংখ্যক অধিৱেশন।
ইতিমধ্যেই অধিৱেশনস্থলীত অস্থায়ী নামঘৰ প্ৰতিষ্ঠা কৰি গুৰুজনাৰ আসন স্থাপন কৰা হৈছে। অধিৱেশনত লক্ষ লক্ষ ভক্তৰ সমাগম লক্ষ্যৰে সকলো যাৱতীয়া ব্যৱস্থা সাজু হৈ উঠিছে । লগতে দূৰ দূৰণিৰ পৰা আহিব লগা ভকত ৱৈষ্ণবক আদৰিবলৈ আদৰণি সমিতি সাজু হৈছে ৷
অধিৱেশন সাফল্য কৰি তুলিবলৈ গঠন কৰা ৩৫ খনকৈ শক্তিশালী উপ সমিতিয়ে দিনে- নিশাই কাম-কাজৰ বুজ লৈছে । ইফালে অধিৱেশনস্থলীৰ ভোজনালয়ত ৩০০টা চৌকা ৩০০ গৰাকী ৰান্ধনীৰ বিপৰীতে ২০০০ গৰাকী বিতৰণ কৰ্মী সাজু হৈ আছে ৷
একেলগে বহি ১০ হেজাৰ ভক্তক অন্ন প্ৰদান কৰিব পৰাকৈ ভোজনালয় নিৰ্মাণ সম্পূৰ্ণ সাজু কৰা হৈছে ৷ আজি হাতীখলা পথাৰত বিভিন্ন প্ৰান্তৰ পৰা আগমন আই মাতৃ বাপ ভকত বৈষ্ণৱসকল উপস্থিত হৈছে । নিৰ্মাণ হৈ উঠিছে কোচ ৰাজবংশী জনগোষ্ঠীৰ মহাবীৰ চিলাৰায়ৰ প্ৰতিমূৰ্ত্তি লগতে শ্ৰীমন্ত শংকৰদেৱ আৰু মাধৱদেৱৰ দুখন তৈলচিত্ৰৰ উপৰিও বিশাল আকাৰৰ শৰাই ।
অভিমন্যুৰ চক্ৰবেহুৰ ভেদ চাবলৈ ইতিমধ্যে প্ৰদৰ্শনী মেলাত সন্ধিয়া সময়ত দৰ্শকৰ ভিৰ দি বাট নোপোৱা অৱস্থা পৰিলক্ষিত হয় । মুঠৰ ওপৰত লোকে লোকাৰণ্যৰে জনসমুদ্ৰত পৰিগণিত দিশে শ্ৰীমন্ত শংকৰদেৱ সংঘৰ অধিবেশনৰ হাতীখলা পথাৰৰ সমন্বয় ক্ষেত্ৰ ।