আৰক্ষীৰ অভিযানত জব্দ চোৰাং তেলসহ টেংকাৰঃ গ্ৰেপ্তাৰ চালক

ডিজিটেল সংবাদ,লামডিং : ৰাজ্যত আৰক্ষী সঞ্চালক প্ৰধান জি পি সিঙে প্ৰদান কৰা কঠোৰ নিৰ্দেশৰ পিছতেই দুৰ্নীতি বিৰুদ্ধে অধিক তৎপৰ হৈ উঠিছে অসম আৰক্ষী ৷ সমান্তৰালভাৱে লামডিঙ আৰক্ষীয়ো দুৰ্নীতি বিৰুদ্ধে অভিযান অব্যাহত ৰাখিছে ৷

এইবাৰ চোৰাং তেলৰ বেহা উৎখাত কৰাৰ অভিযানত নামিছে লামডিং আৰক্ষী ৷ অভিযোগ অনুসৰি লামডিঙত চলিছে চোৰাং তেলৰ বেহা ৷

মঙলবাৰে লামডিং আৰক্ষী থানাৰ ভাৰপ্ৰাপ্ত বিষয়া চন্দনজ্যোতি বৰাই তেল চুৰিৰ চক্ৰটোৰ বিৰুদ্ধে অভিযান চলাই ৷ অভিযোগ অনুসৰি লামডিং আই অ চি এলৰ তেলক লৈ চোৰাং বেহা চলাই গৈছে এটা দুষ্ট চক্ৰই ৷

কাৰ ছত্ৰছায়াত লামডিঙত চোৰাং তেলৰ কলা ব্যৱসায় অব্যাহত আছে সেই ৰহস্য ভেদ কৰিবলৈ খোদ হোজাইৰ আৰক্ষী অধীক্ষকগৰাকীয়ো সক্ৰিয় হৈ পৰিছে ৷ হোজাই আৰক্ষী অধীক্ষকগৰাকীৰ নেতৃত্বত আজি লামডিং-হাফলং ৰ'ডৰ জৰাংদিচাৰ প্ৰণৱানন্দ বিদ্যামন্দিৰ বিদ্যালয়ৰ সমীপতে লামডিং আৰক্ষীয়ে চলোৱা অভিযানত বৃহৎ পৰিমাণৰ চোৰাং তেলসহ তেলৰ টেংকাৰ আৰু এখন টাটা এচিই গাড়ীৰ লগতে ৪২০ লিটাৰ চুৰি তেল ভৰ্তি ড্ৰাম জব্দ কৰিবলৈ সক্ষম হয় ৷

ঘটনা সন্দৰ্ভত আৰক্ষীয়ে টেংকাৰখনৰ চালক দিলীপ দাসক ঘটনাস্থলীৰ পৰা আটক কৰে ৷ আৰক্ষীয়ে AS 01 H C 3011 নম্বৰৰ তেলৰ টেংকাৰ আৰু AS 01 NC 8534 নম্বৰৰ টাটা এচিইখন জব্দ কৰে ৷ লামডিঙত চলি থকা চোৰাং তেলৰ লগত কোন কোন জড়িত আছে সেই সন্দৰ্ভত লামডিঙ আৰক্ষীয়ে অভিযান অব্যাহত ৰাখিছে বুলি জানিবলৈ দিয়ে ৷

আনহাতে চোৰাং তেলৰ লগত IOCLৰ কোনো বিভাগীয় বিষয়া তথা কৰ্মচাৰী জড়িত আছে নেকি সেয়া তদন্তৰ পিছতহে পোহৰলৈ আহিব বুলি জনায়।

Also Read: চাবুৱাৰ বাইপাচত বলেৰ' বাহনত ভয়ংকৰ অগ্নিকাণ্ড