পুনৰ বহিঃৰাজ্যত ৰহস্যজনক মৃত্যু বিহপুৰীয়াৰ যুৱকৰ

ডিজিটেল সংবাদ,বিহপুৰীয়া : পুনৰ বহিঃৰাজ্যত প্ৰাণ হেৰুৱালে বিহপুৰীয়াৰ আন এজন যুৱকে ৷ দেওবাৰে নিশা বিহপুৰীয়াৰ বদতি জামুগুৰিৰ প্ৰবিণ বৰা নামৰ যুৱকজনক হাইদৰাবাদত সতীৰ্থই হত্যা কৰাৰ চাঞ্চল্য মাৰ নৌযাওঁতেই মঙলবাৰে বিহপুৰীয়া আন এজন যুৱকৰ মৃতদেহ উদ্ধাৰ হয় হাইদৰাবাদতে ৷

বিহপুৰীয়াৰ নাহৰআটিৰ যুৱক ঠগেন দাসৰ মৃতদেহ আজি পুৱা উদ্ধাৰ হয় হাইদৰাবাদৰ এটা ৰে'লপথত ৷ জানিব পৰা অনুসৰি কেৰেলাত সংস্থাপন বিচাৰি শনিবাৰে লগৰীয়াৰ সৈতে ঘৰৰ পৰা ওলাই যোৱা যুৱকজন সোমবাৰে হঠাতে ৰে'লৰ পৰা নিৰুদ্দিষ্ট হয় ৷

নিৰুদ্দিষ্ট ঠগেন দাসৰ সন্ধান নাপাই লগৰীয়া কেইজনো কেৰালা অভিমুখে ৰাওনা হয় ৷ ইপিনে আজি পুৱা ৰহস্যজনক অৱস্থাত উদ্ধাৰ হয় যুৱকজনৰ মৃতদেহ ৷ সম্প্ৰতি যুৱকজনৰ পৰিয়ালৰ মাজত হাহাকাৰৰ সৃষ্টি হৈছে ৷ পত্নীসহ তিনিগৰাকী কন্যা সন্তানৰ পিতৃ ঠগেন দাসৰ মৃতদেহ ঘৰলৈ অনাৰ ক্ষেত্ৰত সমস্যাৰ সন্মুখীন হৈছে পৰিয়ালটো ৷

আনহাতে, মেট্ৰীক পৰীক্ষাত অৱতীৰ্ণ হোৱা মাজু জীয়ৰীয়েও আগন্তুক পৰীক্ষাৰ বাবে প্ৰস্তুতি চলাই থকা সময়তে হঠাৎ সংঘটিত হোৱা ঘটনাক লৈ দিক্-বিদিক হেৰুৱাই পেলাইছে ৷ গাওঁবাসী ৰাইজ তথা আত্মীয়ই ঠগেনৰ মৃতদেহ ঘৰলৈ অনাৰ ব্যৱস্থা কৰিবৰ বাবে চৰকাৰক আহ্বান জনায় ৷

Also Read: ৰাজ্যত সমষ্টি পুনৰ্নিধাৰণ সন্দৰ্ভত নিৰ্বাচন আয়োগৰ বৈঠক, অংশগ্ৰহণ কৰাৰ পৰা বিৰত থাকিল ভাৰতীয় জাতীয় কংগ্ৰেছ...