ড্ৰাগছ আসক্ত স্বামী ধৰা পৰাত বিহ পান কৰি আত্মহত্যা পত্নীৰ...

প্ৰতিদিন সংবাদ, ফিল’বাৰীঃ মাৰাত্মক নিচাযুক্ত দ্ৰব্য ড্ৰাগছৰ অবাধ প্ৰচলনৰ ফলত ক্ৰমে ভয়ংকৰ অৱস্থাৰ সৃষ্টি হৈছে বৃহত্তৰ ফিল’বাৰী অঞ্চলত ৷ বিশেষকৈ অঞ্চলটোৰ একাংশ গাঁৱত ড্ৰাগচ আসক্তৰ বাবেই নিতৌ সংঘটিত হ’ব ধৰিছে পৰিয়ালকেন্দ্ৰিক সংঘাতৰ লগতে লুট-পাত তথা চুৰি জনিত ঘটনা ৷

বুধবাৰে ফিল’বাৰী আৰক্ষী থানাৰ অন্তৰ্গত আমগুৰি গাঁৱত পাঁচ জনকৈ যুৱকক ড্ৰাগছ সেৱন থকাৰ অৱস্থাতে স্থানীয় নাজিৰাটিং বহুমুখী উন্নয়ন সংঘৰ কৰ্মকৰ্তাসকলে হাতে-লোটে কৰায়ত্ত কৰে ৷ কৰায়ত্ত কৰি সংঘৰ মজিয়াতে বন্ধুত্বমূলকভাৱে আলোচনা কৰি ধৃত যুৱক কেইজনক ড্ৰাগচমুক্ত সমাজৰ সকে কাম কৰাত সহযোগিতা কৰিবলৈ আহ্বান জনাই ৷

সংঘৰ মজিয়াত ড্ৰাগছ আসক্ত ধৃত যুৱক কেইজনে অঞ্চলটোত ড্ৰাগচৰ বেহা চলাই থকা ৬ গৰাকীকৈ লোকৰ নামো প্ৰকাশ কৰে ৷ ইফালে বহুমুখী উন্নয়ন সংঘৰ মজিয়াত কালি অঞ্চলটোত প্ৰচলন হৈ থকা ড্ৰাগছৰ বিৰুদ্ধে ৰাইজ সৰৱ হৈ থকাৰ সময়তে হঠাৎ স্থানীয় আমগুৰি গাঁৱত সংঘটিত হ’য় এক অনাকাংক্ষিত ঘটনা ৷

ড্ৰাগছ আসক্ত ধৃত পাঁচ যুৱকৰ ভিতৰত অৰুণজ্যোতি মৰাণৰ পত্নী সৰুমাই মৰাণে স্বামীয়ে ড্ৰাগছসহ ধৰা পৰা বুলি জানি নিজা ঘৰতে বিহ পান কৰে ৷ হঠাৎ ৰাসায়নিক দ্ৰব্য সেৱন কৰাত সৰুমাই (২৪)ৰ আমগুৰিৰ ঘৰখনত হুৱা-দুৱা লাগে ৷

পৰিয়ালৰ লোকসকলে সংকটতজনক অৱস্থাত সৰুমাইক চিকিৎসালয়লৈ নিছিল যদিও বৃহস্পতিবাৰে পুৱা বোৱাৰী গৰাকীৰ ডিব্ৰুগড় অসম চিকিৎসা মহাবিদ্যালয় হাস্পতালত শেষ নিশ্বাস ত্যাগ কৰে ৷ বোৱাৰী গৰাকীৰ এই মৃত্যুৰ পাছতে এতিয়া অঞ্চলটোত কৰুণ অৱস্থাৰ সৃষ্টি হৈছে ৷

ড্ৰাগছৰ অবাধ প্ৰচলনৰ পৰিণতিতে এগৰাকী বোৱাৰীয়ে এনেদৰে মৃত্যুক আঁকোৱালী ল’বলগীয়া পৰিস্থিতিৰ সৃষ্টি হ’ল বুলি সৰ্বত্ৰে চৰ্চা চলিছে ৷ বোৱাৰী গৰাকীৰ মাতৃগৃহ মাকুম বৰগাঁওতো শোকৰ ছাঁ পৰিছে ৷ ইপিনে সংঘৰ এজাহাৰৰ ভিত্তিত ধৃত পাঁচ যুৱকক ফিল’বাৰীৰ আৰক্ষীয়ে আটক কৰিছে ৷ পৰিতাপৰ কথা যে অঞ্চলটোত ড্ৰাগচৰ প্ৰচলনে কালৰূপ ধাৰণ কৰা বুলি জানিও স্থানীয় আৰক্ষী-প্ৰশাসনে সময়ত কোনো ব্যৱস্থা নোলোৱাৰ বাবেই এনেধৰণৰ দুৰ্ভাগ্যজনক ঘটনা সংঘটিত হোৱাৰ অভিযোগ উঠিছে ৷

Also Read: নতুন পেঞ্চন নীতিৰ বিৰুদ্ধে লামডিঙত ৰেল শ্ৰমিকৰ প্ৰতিবাদ...