![ভাড়াঘৰৰ কোঠাত উদ্ধাৰ মহিলাৰ মৃতদেহ](http://media.assettype.com/asomiyapratidin%2F2024-02%2F4b5344b1-e34c-485d-8307-7c7ff85985c3%2Fkjkjhjk.jpg?w=480&auto=format%2Ccompress&fit=max)
ডিজিটেল ডেস্কঃ দুধনৈ থানা তথা দামৰা আৰক্ষী চকীৰ অন্তৰ্গত বাখ্ৰাখুঁটীৰ এটা ভাড়াঘৰৰ কোঠাত এগৰাকী মহিলাৰ মৃতদেহ উদ্ধাৰকলৈ চাঞ্চল্য ৷ শুকুৰবাৰে পুৱা ভাড়াঘৰৰ মালিকে গেলমু চেৰ্পা নামৰ মহিলা গৰাকীক বিচনাত বাগৰি থকা অৱস্থাত দেখা পায় ৷ তাৰ পিছতে মহিলা গৰাকীৰ প্ৰেমিকক খবৰ দিয়ে।
তাৰপাছতে গোৱালপাৰাৰ ৰংজুলি মাজপাৰাৰ ধীৰাজ হাজোৱাৰী নামৰ লোকজন আহি মহিলাগৰাকীক এখন বলেৰ’ বাহনত উঠাই দুধনৈ চিকিৎসালয়লৈ নিয়ে ৷ কিন্তু চিকিৎসকে মহিলা গৰাকীক মৃত ঘোষণা কৰে।
ঘটনা সন্দৰ্ভত দুধনৈ আৰক্ষীয়ে অতি ক্ষিপ্ৰতাৰে তদন্ত আৰম্ভ কৰিছে আৰু মহিলা গৰাকীৰ সহজ মৃত্যু নহয়, এয়া হত্যাকাণ্ড হ’ব পাৰে বুলি সন্দেহ কৰিছে ৷ ঘটনাস্থলীত উপস্থিত হৈছে দুধনৈ থানাৰ ভাৰপ্ৰাপ্ত আৰক্ষী বিষয়া দুলাল মহন্তৰ লগতে বৃহৎ এক আৰক্ষীৰ দল ৷ ঘটনাস্থলীত গোৱালপাৰাৰ অপৰাধ অনুসন্ধান বিশেষ গোটৰ দলটোও উপস্থিত হৈ আৰম্ভ কৰিছে তদন্ত ৷ ঘটনাস্থলীলৈ আহিছে জিলা উপ আৰক্ষী অধীক্ষক গৰাকীও ৷
উল্লেখ্য যে, বিগত এটা বছৰ ধৰি মহিলা গৰাকী নিজ সন্তানৰ সৈতে বাখ্ৰাখুঁটীৰ ৰীনা ৰাজবংশী নামৰ মহিলা গৰাকীৰ ঘৰত ভাড়াতীয়া হিচাপে আছিল ৷ মহিলা গৰাকী পূৰ্বে বিবাহ পাশত আৱদ্ধ হৈছিল যদিও স্বামীৰ সৈতে প্ৰায় ৯ বছৰ পূৰ্বে বিবাহ বিচ্ছেদ ঘটিছিল ৷ তাৰ পিছতে প্ৰেমৰ সম্পৰ্ক গঢ় লৈ উঠিছিল ধীৰাজ হাজোৱাৰীৰ সৈতে ৷