গুৱাহাটীত নিৰ্বাচন আয়োগৰ দলঃ কলাক্ষেত্ৰত সমষ্টি পুনৰ নিৰ্ধাৰণৰ শুনানি...

ডিজিটেল ডেস্কঃ সমষ্টি পুনৰ নিৰ্ধাৰণৰ খচৰা সন্দৰ্ভত ৰাজ্যত প্ৰতিবাদ, প্ৰতিক্ৰিয়া অব্যাহত থকাৰ মাজতে ৩ দিনীয়া কাৰ্যসূচীৰে অসমলৈ আহিছে দেশৰ মুখ্য নিৰ্বাচন আয়ুক্ত ৰাজীৱ কুমাৰৰ নেতৃত্বত নিৰ্বাচন আয়োগৰ দল।

দুপৰীয়া প্ৰায় ১ বজাত শ্ৰীমন্ত শংকৰদেৱ কলাক্ষেত্ৰত উপস্থিত হোৱা নিৰ্বাচন আয়োদৰ দলটোৱে ২ বজাৰ পৰা আৰম্ভ কৰিছে শুনানি। বৰঝাৰ বিমানবন্দৰৰ পৰা কটকটীয়া নিৰাপত্তা ব্যৱস্থাৰে শ্ৰীমন্ত শংকৰদেৱ কলাক্ষেত্ৰলৈ নিৰ্বাচন আয়োগৰ দলটোক লৈ অহাৰ লগতে কলাক্ষেত্ৰটো নিৰাপত্তা ব্যৱস্থা কটকটীয়া কৰি তোলা হৈছে।

আজি দিনৰ ২ বজাত শ্ৰীমন্ত শংকৰদেৱ কলাক্ষেত্ৰত শ্ৰীমন্ত শংকৰদেৱ আন্তঃৰাষ্ট্ৰীয় প্ৰেক্ষাগৃহত আয়োগৰ দলটোৱে কামৰূপ মহানগৰ, পশ্চিম কাৰ্বি আংলং, চিৰাং, বাক্সা আৰু ডিমা হাচাওৰ প্ৰতিনিধিৰে আলোচনাত বহিছে।একেটা প্ৰেক্ষাগৃহৰ ৩ নং হলত কামৰূপৰ প্ৰতিনিধি আৰু শ্ৰীশ্ৰী মাধৱদেৱ প্রেক্ষাগৃহত ওদালগুৰি, কাৰ্বি আংলং আৰু কোকৰাঝাৰ জিলাৰ প্রতিনিধিৰে বৈঠকত বহিছে আয়োগৰ দলটো।

উল্লেখ্য যে,২০ জুলাই ২০২৩ ৰ পুৱা ৯-৩০ বজাৰ পৰা দিনৰ ২ বজালৈ শ্ৰীমন্ত শংকৰদেৱ আন্তঃৰাষ্ট্ৰীয় প্ৰেক্ষাগৃহত গোৱালপাৰা, বঙাইগাওঁ, বৰপেটা, নলবাৰী, শোণিতপুৰ আৰু কৰিমগঞ্জৰ প্ৰতিনিধিৰে, ৩ নং হলত দৰং, হাইলাকান্দি, কাছাৰ আৰু দক্ষিণ শালমাৰাৰ প্ৰতিনিধিৰে বৈঠকত বহিব।

শ্ৰীশ্ৰী মাধৱদেৱ প্ৰেক্ষাগৃহত নগাওঁ, মৰিগাওঁ আৰু ধুবুৰীৰ প্ৰতিনিধিয়ে অংশগ্ৰহণ কৰিব। বিয়লি ৩-৩০ বজাৰ পৰা শ্ৰীমন্ত শংকৰদেৱ আন্তঃৰাষ্ট্ৰীয় প্ৰেক্ষাগৃহত ৰাষ্ট্ৰীয় আৰু আঞ্চলিক ৰাজনৈতিক দলসমূহৰ প্ৰতিনিধিৰ সৈতে আলোচনাত বহিব।

আনহাতে ২১ জুলাই ২০২৩ত পুৱা ৯-৩০ বজাৰ পৰা দিনৰ ১২-৩০ বজালৈ শ্ৰীমন্ত শংকৰদেৱ আন্তঃৰাষ্ট্ৰীয় প্ৰেক্ষাগৃহত তিনিচুকীয়া, ধেমাজি আৰু লখিমপুৰ জিলাৰ প্ৰতিনিধি আৰু শ্ৰীশ্ৰী মাধৱদেৱ প্ৰেক্ষাগৃহত ডিব্ৰুগড়, চৰাইদেও, গোলাঘাট আৰু মাজুলীৰ প্ৰতনিধিৰে আয়োগ আলোচনাত বহিব।

Also Read: সমষ্টি পুনৰ নিৰ্ধাৰণঃ নিৰ্বাচন আয়োগৰ শুনানিৰ সময়সূচীত কিছু সালসলনি...