এন কে প্ৰডাকছনৰ স্বত্বাধিকাৰ দেৱ বৰকটকীৰ পত্নীক আক্ৰমণ দুৰ্বৃত্তৰ

ডিজিটেল ডেস্কঃ মহিলাৰ সুৰক্ষাৰ বিষয়টোক লৈ ৰাজ্যজুৰি উত্তপ্ত পৰিস্থিতিৰ সূচনা হোৱাৰ সময়তে আৰক্ষীয়ে গিজগিজাই থকা গুৱাহাটী মহানগৰীত দিনৰ পোহৰতে এগৰাকী মহিলাক আক্ৰমণ কৰি ডকাইতি কাণ্ড সংঘটিত কৰিলে দুই দুৰ্বৃত্তই। জু-ৰোডৰ পিনাকি পথত সংঘটিত হৈছে এই ঘটনা।

জানিব পৰা মতে প্ৰাতঃভ্ৰমণলৈ অহা এগৰাকী মহিলাক এখন মটৰ চাইকেলত অহা দুই দুৰ্বৃত্তই পিষ্টল দেখুৱাই কাঢ়ি নিয়ে ডিঙিৰ চেইন। তাৰোপৰি এই দুই দুৰ্বৃত্তই মহিলাগাৰীক আক্ৰমণ কৰাত তেওঁ মূৰত গুৰুতৰৰভাৱে আঘাত পাইছে। তেওঁৰ মূৰত পৰিছে চাৰিটাকৈ চিলাই।

ভুক্তভোগী মহিলাগৰাকী এন কে প্ৰডাকছনৰ স্বত্বাধিকাৰ দেৱ বৰকটকীৰ পত্নী। এই ঘটনা সন্দৰ্ভত গীতানগৰ আৰক্ষী থানাত গোচৰ ৰুজু কৰা হৈছে যদিও এই পৰ্যন্ত দুৰ্বৃত্ত দুটাক কৰায়ত্ত কৰিব পৰা নাই আৰক্ষীয়ে। মহানগৰীৰ ৰাজপথৰ পৰা এইদৰে মহিলাক পিষ্টল দেখুৱাই আক্ৰমণ কৰা কাৰ্যই পুনৰবাৰ মহিলাৰ সুৰক্ষাৰ বিষয়ত প্ৰশ্নৰ সৃষ্টি হৈছে।

Also Read: মধ্যপ্ৰাচ্যত পুনৰ যুদ্ধ উত্তেজনাঃ ইজৰাইলত জৰুৰী অৱস্থা ঘোষণা, বাতিল বিমান সেৱা