ডিজিটেল সংবাদ,গুৱাহাটীঃ দীপাৱলীৰ আলোকেৰে আলোকিত হৈ আৰম্ভ হৈছে এক বিশেষ শ্বপিং ফেস্টিভেল লিঅ' এক্সপ'২০২৪। ১৮ নৱেম্বৰলৈ মণিৰাম দেৱান ট্রেড্ চেন্টাৰত অনুষ্ঠিত হৈছে ইন্টাৰনেছনেল লিঅ' এক্সপ' ২০২৪। লিঅ' এক্সপ'ৰ ৰূপালী জয়ন্তী উপলক্ষে এক ব্যতিক্রমী প্রয়াসেৰে অনুষ্ঠিত কৰিবলৈ লোৱা হৈছে এই বর্ষৰ মেলাখন।
আয়োজক লিঅ' এডভার্টাইজিঙে সীমাহীন উদ্যম আৰু আগ্রহেৰে এই বর্ষটি উদযাপন কৰিবলৈ লৈছে। চলিত বৰ্ষৰ লিঅ' এক্সপ' শনিবাৰে আনুষ্ঠানিকভাৱে বন্তি প্রজ্বলন কৰি উদ্বোধন কৰে ৰাজ্যৰ মুখ্য তথ্য আয়ুক্ত তথা প্রাক্তন আৰক্ষী সঞ্চালক প্রধান ভাস্কৰজ্যোতি মহন্তই। এই উপলক্ষে আয়োজিত অনুষ্ঠানতে লিঅ' এক্সপ' সন্মান, ২০২৪ প্রদান কৰা হয়।
এইবছৰৰ লিঅ' এক্সপ' শিল্পী সন্মান, ২০২৪ প্রদান কৰা হয় বলিউডৰ আন্তঃৰাষ্ট্ৰীয় খ্যাতিসম্পন্ন অভিনেত্রী সীমা বিশ্বাসক। আনহাতে লিঅ' এক্সপ' সাংবাদিক সন্মান, ২০২৪ প্রদান কৰা হয় ৰাজ্যৰ এগৰাকী বিশিষ্ট সাংবাদিক বাছবীৰ হুছেইনক। মুখ্য তথ্য আয়ুক্ত ভাস্কৰজ্যোতি মহন্তই দুয়োগৰাকী প্রসিদ্ধ ব্যক্তিক এই সন্মান প্রদান কৰে। লিঅ' এক্সপ' সন্মানৰ নিৰ্বাচিত জুৰি সমিতিৰ অধ্যক্ষ তথা বিশিষ্ট অভিনেত্রী মলয়া গোস্বামীৰ লগতে সমিতিৰ আন সদস্যসকল ক্রমে বিশিষ্ট শিল্পী মনীষা হাজৰিকা, জ্যেষ্ঠ সাংবাদিকদ্বয় প্রণয় বৰদলৈ আৰু প্রশান্ত ৰাজগুৰুৱেও এই বঁটা প্রদান অনুষ্ঠানত সহযোগ কৰে।
অনুষ্ঠানত আটাইকেইগৰাকী ব্যক্তিয়ে সীমা বিশ্বাস আৰু বাছবীব হুছেইনে অসমৰ সমাজ জীৱনলৈ আগবঢ়োৱা অৰিহণাৰ শলাগ লোৱাৰ লগতে দুয়োগৰাকী ব্যাক্তিৰ কর্মজীৱনক উচ্চ প্রশংসা কৰে। অনুষ্ঠানত লিঅ' এডভাটাইজিঙৰ অন্যতম স্বত্বাধিকাৰীদ্বয় পাৰভেজ খান আৰু আকবৰ খান উপস্থিত আছিল।
উল্লেখ্য যে ৰূপালী জয়ন্তী বৰ্ষৰ লিঅ' এক্সপ'ত ইৰাণ, আফগানিস্তান, থাইলেণ্ড, বাংলাদেশ, তুৰস্ক সংযুক্ত আৰৱ গণৰাজ্য আদি বিদেশী ৰাষ্ট্ৰৰ প্রতিষ্ঠানে অংশগ্রহণ কৰিছে। দেশী বিদেশী লোভনীয় সামগ্রী, কেইবাটাও বিশেষ আৰু আকর্ষণীয় ৰূপত তৈয়াৰী চেলফি জ'ন, পানীৰ ফোৱাৰা, ফার্নিচাৰৰ পৰা আদি কৰি নিত্য ব্যৱহার্য সামগ্রী একেখন মজিয়াতে পোৱাৰ ব্যৱস্থা, বিভিন্ন জুতি লগা খাদ্য, মনোমোহা আলোক সজ্জা আদিয়ে লিঅ' এক্সপক এক ব্যতিক্রমী মাত্রা প্রদান কৰিছে।
অন্যহাতে সামাজিক দায়বদ্ধতাৰ স্বকীয়তা ৰক্ষা কৰি এইবাৰো লিঅ' এডভাৰটাইজিঙে আয়োজন কৰিছে ছাত্র-ছাত্রীৰ মাজত চিত্রাংকন প্রতিযোগিতা। ৩টা শাখাত হ'বলগীয়া চিত্রাংকন প্রতিযোগিতা খনৰ ক' শাখা- প্রথম শ্ৰেণীৰ পৰা তৃতীয় শ্রেণীলৈ, 'খ' শাখা চতুৰ্থ শ্ৰেণীৰ পৰা ষষ্ঠ শ্রেণীলৈ আৰু 'গ' শাখা সপ্তম শ্ৰেণীৰ পৰা দশম শ্রেণীলৈ।
তিনিওটা শাখাৰে প্ৰথম পুৰস্কাৰ নগদ ১৫,০০০ (পোন্ধৰ হাজাৰ) টকা আৰু মানপত্র, দ্বিতীয় পুৰস্কাৰ নগদ ১০,০০০ (দহ হাজাৰ) টকা আৰু মানপত্ৰ আৰু তৃতীয় পুৰস্কাৰ নগদ ৫,০০০ (পাঁচ হাজাৰ) টকা আৰু মানপত্র বুলি জানিবলৈ দিয়ে লিঅ' এক্সপ' সমিতিয়ে। লগতে ৯৯৫৭৮০১৪২৩/৭৭৬৪০৮৭২০২ নম্বৰত নামভৰ্তিৰ বাবে যোগাযোগৰ পৰামৰ্শ দিছে।
