![বিশ্ব স্বাস্থ্য সংস্থাৰ প্ৰতিবেদনত প্ৰকাশ পাইছে ভয়ংকৰ তথ্য](http://media.assettype.com/asomiyapratidin%2F2024-06%2F63c47baf-35b7-4fb6-bf82-978662291356%2F1__18_.jpg?w=480&auto=format%2Ccompress&fit=max)
ডিজিটেল ডেস্ক: কৰোনা মহামাৰীয়ে সন্ত্ৰাস আৰম্ভ কৰা চাৰি বছৰ পাৰ হ'ল যদিও ইয়াৰ প্ৰভাৱ আজিও অব্যাহত আছে।বিশ্ব স্বাস্থ্য সংস্থাৰ মতে, কোভিড ১৯ৰ ফলত মানুহৰ আয়ুস ২ বছৰলৈকে হ্ৰাস পাইছে। হয়, শেহতীয়াকৈ বিশ্ব স্বাস্থ্য সংস্থাই প্ৰকাশ কৰা এক প্ৰতিবেদনত এই বিষয়ে স্পষ্ট কৰিছে। প্ৰতিবেদনত লগতে উল্লেখ কৰা হৈছে যে, কৰোনাৰ ফলত মানুহৰ মাজত আন বহুতো ৰোগ বিকশিত হৈছে।
বিশ্ব স্বাস্থ্য সংস্থাৰ বিশেষজ্ঞসকলৰ মতে, যোৱা অৰ্ধ শতিকাত আন যিকোনো ঘটনাতকৈ সামগ্ৰিক স্বাস্থ্য আৰু জীৱনৰ প্ৰত্যাশাৰ ওপৰত কোভিড-১৯য়ে আটাইতকৈ গভীৰ প্ৰভাৱ পেলাইছে। বিশ্ব স্বাস্থ্য সংস্থাৰ মহানিৰ্দেশক টেড্ৰোছ অধানম ঘেব্ৰেয়েচাছে বিশ্বব্যাপী স্বাস্থ্য সুৰক্ষা শক্তিশালী কৰা আৰু স্বাস্থ্যৰ ক্ষেত্ৰত দীৰ্ঘম্যাদী বিনিয়োগৰ প্ৰচাৰৰ গুৰুত্বৰ ওপৰত আলোকপাত কৰে।
বিশ্ব স্বাস্থ্য সংস্থাৰ প্ৰতিবেদন অনুসৰি, এই মহামাৰীত২০২০-২০২১ৰ প্ৰাৰম্ভিক পৰ্যায়ত ১৫.৯ নিযুতৰো অধিক লোকৰ মৃত্যু হৈছিল। কৰোনাই পোনপটীয়াকৈ মানুহৰ স্বাস্থ্যৰ গুৰুতৰ ক্ষতি কৰিছে। এই ভাইৰাছৰ ফলত হোৱা পৰিস্থিতিৰ ফলত মানুহ পুষ্টিহীনতাত ভুগিছিল। একে সময়তে, ২০২২ত মহামাৰীৰ বাবে ঘৰতে থাকি অধিক খাদ্য খাই ৫ বছৰৰ উৰ্ধৰ ১ বিলিয়নৰো অধিক লোক মেদবহুলতাৰ চিকাৰ হৈছিল। শিশুৰ মাজত হৈছিল পুষ্টিহীনতাৰ দৰে গুৰুতৰ সমস্যা। এই সকলোবোৰ পৰিস্থিতিয়ে মানুহৰ স্বাস্থ্যক বাৰুকৈয়ে প্ৰভাৱিত কৰিছে আৰু অকাল মৃত্যুৰ বিপদাশংকা বৃদ্ধি কৰিছে।