এটা ছুটকেছৰ কাৰণে বিপদত পিতৃ-কন্যা! কিন্তু কিয় ?

ডিজিটেল ডেস্কঃ এটা ছুটকেছ আৰু এহাল পিতৃ-কন্যাক লৈ চেন্নাইৰ মিঞ্জুৰ ৰেলৱে ষ্টেচনত হৈ-চৈ। সকলোৱে ছুটকেছটোলৈ ঘূৰি ঘূৰি চাইছে। ছুটকেছটোৱে আতংকিত কৰিছে ৰেলৱে ষ্টেচনত থকা লোক সকলক।

কিন্তু কাৰো লৈ ভূক্ষেপ নকৰি ছুটকেছটো লৈ গন্তব্য স্থানলৈ আগবাঢ়িছে পিতৃ-কন্যা। এটা সময়ত কৌতূহল বাঢ়ি যোৱাত আৰ পি এফক খবৰ দিয়ে ৰাইজে। কাৰণ ছুটকেছটোৰ পৰা টুপ টুপ কৈ পৰিছে তেজ।

লগে লগে ঘটনাস্থলীত আৰ পি এফ উপস্থিত হৈ পিতৃ-কন্যাক সোধ-পোছ কৰে। তেতিয়াহে ওলাল ওৰহীৰ ওৰ। আৰক্ষীয়ে লোকজনক ছুটকেছত কি আছে সোধাত তেওঁ কাপোৰ বুলি কয় যদিও আৰক্ষীৰ সন্দেহ উপজাত আৰক্ষীয়ে তালাচী চলাই ছুটকেছটোৰ।

আশ্বায্যজনকভাৱে ছুটকেছটোৰ পৰা আৰক্ষীয়ে উদ্ধাৰ কৰে এগৰাকী মহিলাৰ মৃতদেহ। সমগ্ৰ ঘটনাই চাঞ্চল্যৰ সৃষ্টি কৰে। আৰক্ষীয়ে লগে লগে লোকজনক আটক কৰে। আৰক্ষীৰ তথ্যত প্ৰকাশ পোৱা অনুসৰি,৪৩ বছৰীয়া সুনাৰ বালাসুব্রমনিয়াম নামৰ লোকজনে তেওঁৰ চুবুৰীটোত বাস কৰা এগৰাকী মহিলাক সোণৰ লেন-দেনৰ বাবে হত্যা কৰিছিল।

হত্যাকাণ্ড লুকুৱাই ৰখাৰ অভিসন্ধিৰে অভিযুক্তই কন্যাৰ সৈতে মিলি মহিলাগৰাকীৰ মৃতদেহটো ছুটকেছত ভৰাই চেন্নাইলৈ লৈ আনে। চেন্নাইৰ মিঞ্জুৰ ৰেলৱে ষ্টেচনত মৃতদেহ থকা ছুটকেছটো থৈ পলায়ণ কৰিব লওঁতেই আৰক্ষীয়ে আটক কৰে পিতৃ-কন্যাক। ইতিমধ্যে বালাসুব্রমনিয়ামে ঘটনা সংঘটিত কৰাৰ কথা স্বীকাৰ কৰা বুলি জনাইছে আৰক্ষীয়ে। সমগ্ৰ ঘটনা সন্দৰ্ভত তদন্ত অব্যাহত ৰাখিছে আৰক্ষীয়ে।

Also Read: বীৰেন্দ্ৰ কুমাৰ ভট্টাচাৰ্যৰ জন্ম শতবৰ্ষ উপলক্ষে নতুন দিল্লীত ৰাষ্ট্ৰীয় পৰ্যায়ৰ চেমিনাৰৰ আয়োজন সাহিত্য অকাডেমীৰ...