অত্যাধিক চমকেই কাল! আৱাহন থিয়েটাৰ চাবলৈ গৈ আহত দুগৰাকী দৰ্শক...

ডিজিটেল ডেস্কঃ অত্যাধিক চমক দেখাবলৈ গৈ বাৰে বাৰে অঘটন সংঘটিত হৈছে ভ্ৰাম্যমাণৰ ইটোৰ পাছত সিটো নাট্যদলৰ। যতীন বৰা, শামন্তিকা শৰ্মাৰ পিছত এইবাৰ অঘটন সংঘটিত হৈছে প্ৰস্তুতি পৰাশৰ নেতৃত্বাধীন আৱাহন থিয়েটাৰত।

শেহতীয়াকৈ পাঠশালাত চলি আছে আৱাহন থিয়েটাৰ। শনিবাৰে পাঠশালাত আৱাহনৰ মেডাম মেনকা নামৰ নাটকখন মঞ্চস্থ কৰি থাকোতেই সংঘটিত হৈছে এক ভয়ংকৰ অঘটন। মুখ্য অভিনেত্ৰী প্ৰস্তুতি পৰাশৰ প্ৰৱেশৰ সময়ত ফুটোৱা আতচবাজিৰ ফিৰিঙতি পৰি আহত হৈছে দুগৰাকী দৰ্শক।

এই ভয়ংকৰ কাণ্ডৰ পাছতে আহত মহিলাগৰাকীক হস্পাতালত ভৰ্তি কৰা হয়। আঘাতপ্ৰাপ্ত মহিলাগৰাকীৰ নাম জোনালী কলিতা বুলি জানিব পৰা গৈছে। ইফালে আঘাতপ্ৰাপ্ত হোৱা যুৱকগৰাকীৰ আঘাত সামান্য বুলি জানিব পৰা গৈছে। আহত যুৱকগৰাকীৰ নাম নিশান্ত দাস।

ইফালে এই ঘটনা সংঘটিত হোৱাৰ পাছতে সমগ্ৰ ঘটনাতো গাপ দিয়াৰ চেষ্টা কৰে থিয়েটাৰ কৰ্তৃপক্ষই। এই ঘটনা সংঘটিত হোৱাৰ পাছতে কিছুসময়ৰ বাবে নাট পৰিৱেশনো বন্ধ হৈ থাকে। ইতিমধ্যে এই ঘটনাক লৈ আহত যুৱকগৰাকীয়ে সামাজিক মাধ্যমত ক্ষোভ ব্যক্ত কৰিছে।

Also Read: সাৱধানঃ প্ৰৱল বৃষ্টিপাতৰ ফলত গুৱাহাটীত আকৌ হ'ব কৃত্ৰিম বান!