ডিজিটেল সংবাদ, গুৱাহাটীঃ বোকাখাতৰ নাহৰজান চাহ বাগিচাত সংঘটিত বলাৎকাৰৰ ঘটনাৰ অভিযুক্তক দৃষ্টান্তমূলক শাস্তিৰ দাবী জনাইছে আম আদমী পাৰ্টিৰ ৰাজ্যিক সভাপতি মনোজ ধানোৱাৰে। আজি আপৰ ৰাজ্যিক সভাপতি গৰাকীয়ে এক প্ৰেছ বিজ্ঞপ্তি যোগে এই সন্দৰ্ভত কয়, " গোলাঘাট জিলাৰ অন্তৰ্গত নাহৰজান চাহ বাগিচাত এগৰাকী কিশোৰীক ৫৫ বছৰ বয়সৰ এটা লম্পটে ধৰ্ষণ কৰাৰ অভিযোগ উত্থাপন হৈছিল।
মনোজ নাইক নামৰ বলাৎকাৰীটোক স্থানীয় লোকে উত্তম মাধ্যম শোধাই আৰক্ষীৰ হাতত গতাই দিয়াৰ পিছতো আৰক্ষীৰ ভূমিকাক লৈ আশ্বস্ত হোৱা নাই স্থানীয় লোক। আমি এই ক্ষেত্ৰত ঘটনাৰ নিৰপেক্ষ তদন্তৰ লগতে অভিযুক্তৰ বিৰুদ্ধে কঠোৰৰ পৰা কঠোৰতম ব্যৱস্থা গ্ৰহণৰ দাবী জনাইছোঁ। " আপৰ ৰাজ্যিক সভাপতি ধানোৱাৰে ৰাজ্যখনত মহিলাৰ সুৰক্ষা প্ৰদানৰ ক্ষেত্ৰত বৰ্তমান চৰকাৰৰ ব্যৰ্থতাৰো সমালোচনা কৰে। তেওঁ কয়," বৰ্তমান কেন্দ্ৰ আৰু ৰাজ্য উভয়তে বিজেপিৰ চৰকাৰ।
প্ৰধানমন্ত্ৰী নৰেন্দ্ৰ মোদীয়ে এফালে বেটী বাচাওঁ বেটী পঢ়াওঁ নীতিৰ কথা কৈছে, আনহাতে তেওঁৰ নিজৰ দলৰ চৰকাৰে মহিলাৰ সুৰক্ষাৰ ক্ষেত্ৰত শোচনীয় ভাৱে ব্যৰ্থ হৈছে। আম আদমী পাৰ্টিয়ে ৰাজ্যত মহিলাৰ নিৰাপত্তা সুনিশ্চিত কৰাৰ দাবী জনায়। তদুপৰি আপৰ সভাপতি গৰাকীয়ে ধৰ্ষণৰ অভিযুক্তক ফাষ্টট্ৰেক আদালতৰ জৰিয়তে ক্ষিপ্ৰতাৰে বিচাৰ প্ৰক্ৰিয়া সম্পন্ন কৰি শাস্তি প্ৰদান কৰিবলৈ দাবী জনায়।
