বঙাইগাঁও শোধনাগাৰৰ কাৰ্যবাহী সঞ্চালকক সম্বৰ্ধনা লক্ষ্মণ প্ৰসাদ আচাৰ্যৰ

ডিজিটেল সংবাদ, চিৰাংঃ কেন্দ্ৰীয় চৰকাৰৰ "২০২৫ চনৰ ভিতৰত টি বি মুক্ত ভাৰত অভিযান"ৰ ক্ষেত্ৰত বঙাইগাঁও শোধনাগাৰে লোৱা বলিষ্ঠ পদক্ষেপৰ বাবে শোধনাগাৰটোৰ কাৰ্যবাহী সঞ্চালক তথা শোধনাগাৰ মুৰব্বী নয়ন কুমাৰ বৰুৱাক ৰাজ্যপাল লক্ষ্মণ প্ৰসাদ আচাৰ্যই সম্বৰ্ধনা জ্ঞাপন কৰে।

উল্লেখ্য যে বঙাইগাঁও শোধনাগাৰে চিৰাং, বঙাইগাঁও আৰু কোকৰাঝাৰ জিলাৰ প্ৰতিখনৰে ২৫০ জনকৈ যক্ষ্মা ৰোগীৰ দায়িত্ব গ্ৰহণ কৰিছে। এই সক্ৰিয় পদ্ধতিৰ ২০২৫ চনৰ ভিতৰত যক্ষ্মা ৰোগ নিৰ্মূল কৰাৰ ভাৰত চৰকাৰৰ অভিলাষী লক্ষ্যৰ সৈতে মিল আছে।

এই দায়িত্ব গ্ৰহণ কৰি বঙাইগাঁও শোধনাগাৰে কেৱল নিজৰ কৰ্পৰেট সামাজিক দায়বদ্ধতা পালন কৰাই নহয় জনস্বাস্থ্যতো স্পষ্ট প্ৰভাৱ পেলাইছে। যোৱা ৭ ডিচেম্বৰত গুৱাহাটী চিকিৎসা মহাবিদ্যালয় আৰু চিকিৎসালয়ৰ সভাকক্ষত ৰাজ্যিক পৰ্যায়ৰ ১০০ দিনীয়া যক্ষ্মা নিৰ্মূলকৰণৰ বাবে তীব্ৰতৰ অভিযানৰ শুভাৰম্ভণি অনুষ্ঠানত এই সম্বৰ্ধনা জনোৱা হয়।

এই দেশব্যাপী অভিযানৰ লক্ষ্য হৈছে ৩৩ খন ৰাজ্য আৰু কেন্দ্ৰীয় শাসিত অঞ্চলৰ অগ্ৰাধিকাৰ ভিত্তিত ৩৪৭খন জিলাত যক্ষ্মাৰ পাদুৰ্ভাৱ আৰু মৃত্যু হ্ৰাস কৰাৰ প্ৰচেষ্টা তীব্ৰতৰ কৰা। ১০০ দিনীয়া এই অভিযানত যক্ষ্মা নিৰ্মূলৰ প্ৰচেষ্টা ত্বৰান্বিত কৰাৰ বাবে এক ব্যাপক কৌশল ব্যৱহাৰ কৰা হ’ব।