'জনসাধাৰণে সংবিধানক শক্তিশালী কৰাৰ দৰেই সংবিধানেও জনসাধাৰণক শক্তিশালী কৰে'

ডিজিটেল ডেস্কঃ সংবিধান দিৱস উপলক্ষে ৰাজভৱনত আজি অনুষ্ঠিত হয় বিশেষ অনুষ্ঠান। সংবিধান দিৱসৰ এই অনুষ্ঠানত ৰাজ্যপাল জগদীশ মুখীয়ে কয় যে, বিশ্বৰ আটাইতকৈ বৃহৎ গণতন্ত্ৰৰ গাঁথনি, লালন-পালন আৰু বাহাল ৰখাৰ বাবে ভাৰতৰ বিশেষাধিকাৰ আছে।

সেয়েহে এই বৃহত্তম গণতন্ত্ৰৰ পথ প্ৰদৰ্শক সংবিধানে প্ৰতিজন সাধাৰণ নাগৰিকৰ অস্তিত্বৰ সৈতে সংযোগ স্থাপন কৰিব লাগে আৰু তেওঁলোকৰ আকাংক্ষা প্ৰতিফলিত কৰিব লাগে। অনুষ্ঠানত তেওঁ লগতে কয়, যিহেতু ভাৰতৰ সংবিধান হৈছে দেশৰ সকলোৰে বাবে একমাত্ৰ শক্তিৰ উৎস, সেয়েহে ইয়াক সকলোৰে জীৱন অধিক অৰ্থপূৰ্ণ কৰি তুলিবলৈ পথ প্ৰদৰ্শক হিচাপে ব্যৱহাৰ কৰা উচিত।

সংবিধান আৰু জনসাধাৰণৰ মাজৰ অন্তৰ্নিহিত সম্পৰ্ক উল্লেখ কৰি ৰাজ্যপালগৰাকীয়ে কয় যে, সংবিধানে জনসাধাৰণক সংবিধানক শক্তিশালী কৰাৰ দৰেই জনসাধাৰণকো শক্তিশালী কৰে। যেতিয়া ব্যক্তি আৰু প্ৰতিষ্ঠানবোৰে সংবিধানে তেওঁলোকৰ বাবে কি কৰিছে আৰু ই কেনেদৰে তেওঁলোকৰ সামৰ্থ্য গঢ়ি তুলিছে বুলি প্ৰশ্ন উত্থাপন কৰিব তেতিয়াই সমান্তৰালকৈ এই প্ৰশ্নৰো উত্থাপন হ'ব যে, সেই ব্যক্তি আৰু অনুষ্ঠানে সংবিধান বজাই ৰাখিবলৈ কি কৰিছে।

সংবিধানে জনসাধাৰণক শক্তিশালী কৰাৰ দৰেই জনসাধাৰণেও প্ৰতিদিনে তেওঁলোকৰ কাৰ্যকলাপৰ দ্বাৰা সংবিধান শক্তিশালী কৰা উচিত। ৰাজ্যপালগৰাকীয়ে লগতে কয় যে, সংবিধান প্ৰস্তুতকৰ্তাসকলৰ অন্যতম উৎকৃষ্ট অৱদান হৈছে তেওঁলোকৰ পদক্ষেপ, ৰাষ্ট্ৰৰ সাৰ্বভৌমত্ব অৱশেষত দেশৰ নাগৰিকৰ হাতত ন্যস্ত।

সেয়েহে, সংবিধান সভাৰ দৃঢ় বিশ্বাস আছিল, তেওঁলোকৰ মৌলিক অধিকাৰৰ ওপৰত দাবী আছে। অৱশ্যে, অধ্যাপক মুখীয়ে কয় যে, নাগৰিকৰ তেওঁলোকৰ মৌলিক অধিকাৰৰ লগতে মৌলিক কৰ্তব্যৰ ৰূপত ৰাষ্ট্ৰ আৰু সমাজৰ প্ৰতিও দায়বদ্ধতা আছে। সেয়েহে তেওঁ সকলোকে সংবিধানত অন্তৰ্ভুক্ত মৌলিক কৰ্তব্যসমূহৰ ওপৰতো গুৰুত্ব প্ৰদান কৰিবলৈ আহ্বান জনাইছে।

অধ্যাপক মুখীয়ে, জনসাধাৰণক একত্ৰিত কৰিবলৈ আৰু মৌলিক কৰ্তব্যৰ বাবে ব্যাপক সজাগতা সৃষ্টি কৰিবলৈ দেশৰ লোকসকলক একত্ৰিত কৰা উচিত বুলিও মন্তব্য কৰিছে। গণতন্ত্ৰৰ আটাইতকৈ শক্তিশালী সঁজুলি হৈছে গণ আন্দোলন।

সেয়েহে, ভাৰতীয় গণতন্ত্ৰতো জনসাধাৰণক মৌলিক কৰ্তব্য পালন কৰিবলৈ অনুপ্ৰাণিত কৰাৰ বাবে বৃহৎ পৰিমাণৰ জনমত থাকিব লাগে। অনুষ্ঠানত ৰাজ্যপাল জদগীশ মুখীয়ে ড০ ৰাজেন্দ্ৰ প্ৰসাদ, ড০ বি আৰ আম্বেদকাৰ আদি সংবিধান প্ৰস্তুতকৰ্তাসকললৈ শ্ৰদ্ধাঞ্জলি জ্ঞাপন কৰে।

২০১৫ চনত প্ৰধানমন্ত্ৰী নৰেন্দ্ৰ মোদীৰ নেতৃত্বত কেন্দ্ৰীয় চৰকাৰে সংবিধানৰ প্ৰণেতাসকলৰ অৱদানক স্বীকাৰ আৰু সন্মান জনোৱাৰ বাবে ২৬ নৱেম্বৰক সংবিধান দিৱস হিচাপে ঘোষণা কৰাৰ কথা উল্লেখ কৰে। এই সংবিধান প্ৰণেতাসকল দূৰদৃষ্টি সম্পন্ন আছিল বুলি উল্লেখ কৰি তেওঁ কয়, তেওঁলোকে ভৱিষ্যত প্ৰজন্মক সংবিধান সংশোধনী কৰাৰ ক্ষমতা প্ৰদান কৰিবলৈ সংবিধানক নমনীয় কৰি তুলিছিল।যাতে তেওঁলোকক অধিক অৰ্থপূৰ্ণ আৰু পৰিৱৰ্তনশীল সময়ৰ সৈতে সামঞ্জস্যপূৰ্ণ কৰি তুলিব পাৰি।

তেওঁৰ মতে, ভাৰতীয় সংবিধান কঠোৰ নহয় কিন্তু এক জীৱন্ত দস্তাবেজ। সংবিধান সভাই জনসাধাৰণৰ আকাংক্ষাক সামঞ্জস্য কৰি তুলিবলৈ বিগত বছৰবোৰত সংসদৰ দ্বাৰা সংবিধান সংশোধন কৰা হৈছে।

ইফালে এই অনুষ্ঠানত ৰাজ্যসভাৰ সাংসদ তথা দেশৰ পূৰ্বৰ মুখ্য ন্যায়াধীশ ৰঞ্জন গগৈয়ে অংশগ্ৰহণ কৰি ভাষণ প্ৰসংগত কয় যে, সংবিধান প্ৰস্তুত কৰ্তাসকলৰ কঠোৰ পৰিশ্ৰমৰ অৱধান ভাৰতীয় সংবিধান। সংবিধান প্ৰস্তুত আছিল এক দীঘলীয়া প্ৰচেষ্টা। তেওঁ কয়, যেতিয়া সংবিধান সভাৰ প্ৰণেতাসকলে সংবিধানৰ খচৰা প্ৰস্তুত কৰিছিল, তেওঁলোকে মুখ্যতঃ পাৰস্পৰিক বিশ্বাসৰ চেতনাৰ ওপৰত নিৰ্ভৰ কৰিছিল। তদুপৰি, তেওঁলোকে সংবিধানৰ দৰ্শনক চিৰস্থায়ী কৰি তুলিব বিচাৰিছিল।

সংবিধান প্ৰস্তুতকৰ্তাসকল অতি দূৰদৰ্শী আছিল সেয়েহে তেওঁলোকে নিৰ্দিষ্ট প্ৰয়োজনীয়তা বোৰ ৰখাৰ বাবে সংবিধানত যুক্তৰাষ্ট্ৰ আৰু একতাৰ চৰিত্ৰৰ ব্যৱস্থা কৰিছিল। তেওঁ সংবিধানৰ সামগ্ৰিক মনোভাৱ আৰু ই কেনেদৰে বিভিন্ন পৰিস্থিতিত সেৱা আগবঢ়াই আছে তাৰ ওপৰতো বিতংভাৱে ব্যাখ্যা আগবঢ়ায়।

অসম বিধান সভাৰ অধ্যক্ষ বিশ্বজিৎ দৈমাৰীয়েও অনুষ্ঠানত ভাষণ প্ৰদান কৰে। তেওঁ ভাষণত, সমগ্ৰ বিশ্বৰ সৰ্ববৃহৎ গণতন্ত্ৰ হোৱাৰ বাবে আমাৰ সংবিধানে মৰ্যাদা আৰু সন্মানৰ জীৱন যাপনৰ বাবে নাগৰিকক চূড়ান্ত পথ প্ৰদৰ্শন কৰে। তেওঁ লগতে কয় যে, প্ৰতিজন ব্যক্তিয়ে সংবিধানৰ নিয়ম-কানুনৰ সৈতে ভালদৰে পৰিচিত হোৱা প্ৰয়োজন।

তেওঁ আশা প্ৰকাশ কৰে সংবিধান দিৱস উদযাপনে নিশ্চিতভাৱে আমাৰ সংবিধানৰ বিষয়ে অধিক আলোচনা কৰিবলৈ আৰু নাগৰিকৰ অধিকাৰ উপলব্ধি কৰিবলৈ সজাগতা সৃষ্টিত জনসাধাৰণৰ মাজত এক স্ফুলিঙ্গ সৃষ্টি কৰিব।

অনুষ্ঠানত গুৱাহাটী উচ্চ ন্যায়ালয়ৰ প্ৰাক্তন ন্যায়াধীশ, সংবিধানিক সংস্থাসমূহৰ অধ্যক্ষ, প্ৰাক্তন আৰক্ষী সঞ্চালক প্ৰধান, বিশ্ববিদ্যালয়সমূহৰ আইন বিভাগৰ অধ্যাপক, অতিৰিক্ত মহাধিবক্তা, ন্যায়িক বিভাগৰ বিষয়া, বাৰ কাউন্সিলৰ সদস্য, আইন মহাবিদ্যালয়ৰ অধ্যক্ষ, সংবাদ প্ৰতিষ্ঠানৰ সম্পাদক, ৰাজভৱনৰ বিষয়া তথা কৰ্মচাৰী আৰু অন্যান্য গণ্যমান্য ব্যক্তিসকল উপস্থিত আছিল।

ক্লিক কৰি পঢ়কঃ ১৯৯১ ত আৱেদন, ২০১৩ ত নিৰ্মাণ: তথাপিও মুকলি নহ'ল বটদ্ৰৱা প্ৰাথমিক স্বাস্থ্য কেন্দ্ৰ