ডিজিটেল সংবাদ, ধেমাজিঃ ধেমাজি নগৰৰ পৰা প্ৰায় ডেৰ কিলোমিটাৰ নিলগৰ বকল গাওঁত আজি একে দিনাই একে ঘৰতে দুই গৰাকীও লোক মৃত্যু হোৱা ঘটনাই ধেমাজিত গভীৰ শোকৰ ছাঁ পেলাইছে৷
জানিব পৰা মতে, ধেমাজি বকল গাওঁৰ নিবাসী তথা দুসুঁতিমুখ প্ৰাথমিক বিদ্যালয়ৰ অৱসৰপ্ৰাপ্ত প্ৰধান শিক্ষয়িত্ৰী অবিবাহিত ৰঞ্জু বৰগোহাঁই (৭১) বয়সত সোমবাৰে পুৱা ১১ বজাত মৃত্যু হোৱা ৮ ঘন্টা পাৰ নৌহওঁতেই তেওঁৰে ভতিজাক শশাংক বৰগোহাঁই(৩৩)বয়সত সন্ধিয়া ৮.৩০ বজাত হঠাতে মৃত্যুক আকোঁৱালি লয় ৷
পেহীয়েকৰ চিতা জ্বলি শেষ নহওঁতেই আকৌ ভতিজাকৰ শৱদেহ চিতাত তুলি ল'বলগীয়া হোৱা হৃদয়বিদাৰক ঘটনাই সমগ্ৰ অঞ্চলটোতেই গভীৰ শোকৰ ছাঁ পৰিছে৷ উল্লেখ্য যে, এই দুই গৰাকী মৃত ব্যক্তি হৈছে ধেমাজি সাহিত্য সভাৰ এসময়ৰ শক্তিশালী সম্পাদক তথা ধেমাজি উচ্চতৰ মাধ্যমিক বিদ্যালয়ৰ অৱসৰপ্ৰাপ্ত শিক্ষক প্ৰয়াত কন্ঠি বৰগোহাঁইৰ ভনীয়েক আৰু ভতিজাক হয় ৷
