ডকমকা অবৈধ বিলাতী সুৰা জব্দ

ডিজিটেল সংবাদ, হাওৰাঘাট : কাৰ্বি আংলং জিলাৰ ডকমকাত ডকমকা আৰক্ষীৰ নিয়মীয়া নাকা তালাচীত বুধবাৰে দিনৰ প্ৰায় ১-৩০ বজাত জব্দ কৰা হৈছে বিলাতী সুৰা। জানিবলৈ দিয়া অনুসৰি মেঘালয়ৰ পৰা ইম্ফল অভিমুখে গৈ থকা বইলাৰ মুৰ্গী দানা ভৰ্তি NL  07A A2397 মালবাহী ট্ৰাক গাড়ীখনৰ পৰা সুৰাখিনি জব্দ কৰে।

জব্দকৃত সুৰাখিনি অবৈধভাৱে সাৰৰ বস্তাৰ মাজত লুকুৱাই অনা বুলি আৰক্ষীয়ে জানিবলৈ দিয়ে। মুঠ ৭৫ কাৰ্টুন সুৰা আৰক্ষীয়ে জব্দ কৰিবলৈ সক্ষম হয়।

উল্লেখযোগ্য যে গাড়ী চালক বিক্ৰম ৰয় আৰু তেওঁৰ সহযোগী মিচলায় নামৰ যুৱক দুয়োজনে অতি কৌশলেৰে দানাৰ বস্তাৰ মাজত লুকুৱাই আনিছিল সুৰাখিনি। ডকমকা আৰক্ষীৰ ভাৰপ্ৰাপ্ত আৰক্ষী বিষয়া ৰিতুপল সেনচোৱাৰ নেতৃত্বত চলা ডকমকা আৰক্ষীৰ নিয়মীয়া নাকা তালাচীত সুৰাখিনি জব্দ কৰিবলৈ সক্ষম হয়।