জামুগুৰিহাটত চোৰে নিদ্ৰাহৰণ কৰিছে ৰাইজৰ : গৰু আৰু বাহনসহ চাৰিজন চোৰক কৰায়ত্ব

ডিজিটেল সংবাদ, জামুগুৰিহাট : গৰুচোৰে নিদ্ৰা হৰিছে জামুগুৰিহাটৰ কৃষক ৰাইজৰ ৷ নিতৌ গ্ৰামাঞ্চলৰ কৃষক ৰাইজৰ গোহালিৰ পৰা গৰু চোৰ কৰি একপ্ৰকাৰ চিন্তিত কৰি তুলিছে লোকসকলক ৷

তাৰ মাজতেই বুধবাৰে নিশা গোহালিৰ পৰা গৰু চুৰি কৰি এখন ব’লেৰ পিক আপ গাড়ীৰে নি থকা অৱস্থাতে আৰক্ষীৰ হাতত ধৰা পৰে গৰুচোৰ ৷ কালি নিশা জামুগুৰি আৰক্ষী থানাৰ অন্তৰ্গত চকীঘাটৰ মহিম হাজৰিকাৰ গোহালিৰ পৰা ৩ টা গৰু চোৰ কৰি বাহনখনত লৈ চোৰৰ দলটো উধাও হোৱাৰ সময়তে আৰক্ষীয়ে কৰায়ত্ব কৰিবলৈ সক্ষম হয় ৷

জামুগুৰি আৰক্ষী থানাৰ ভাৰপ্ৰাপ্ত আৰক্ষী বিষয়া হাদি আলি সৰকাৰৰ নেতৃত্বত যোৱা আৰক্ষীৰ দলটোৱে চুৰি গৰু আৰু গাড়ীসহিতে ৪জন গৰুচোৰক কৰায়ত্ব কৰে। তেঁওলোক হৈছে ক্ৰমে- আমিৰ হামজা, কুটুবুদ্দিন, কাচিমুদ্দিন আৰু আব্দুল মান্নান। কেউজনকে গ্ৰেপ্তাৰ কৰি বৃহস্পতিবাৰে জে’ল হাজোতলৈ প্ৰেৰণ কৰে ৷

ইফালে কালি নিশা পুনৰ জামুগুৰিহাটৰ খাদৈচুক গাঁৱৰ জিতু নাথৰ গোহালিৰ পৰাও এজনী গাই আৰু এজনী চেউৰি গাই চোৰে চুৰ কৰি নিয়ে ৷ উল্লেখ্য যে জামুগুৰিহাটত বিগত কেইমাহমানতে অতিমাত্ৰা গৰুচোৰ, চেইনচোৰ, ধৰ্মীয় স্থানত চুৰি আদি কাৰ্যই নিদ্ৰাহৰণ কৰিছে গঞা লোকসকলৰ ৷ এইক্ষেত্ৰত আৰক্ষীক অধিক কঠোৰ হোৱাৰ আহ্বান জনাইছে সচেতন লোকসকলে ৷

Also Read: দাম বাঢ়িল অসম সন্তান ৰিয়ান পৰাগৰ : কোন খেলুৱৈক কিমান দামত ক্ৰয় কৰিলে পঢ়ক সবিশেষ