আইতা, তোমাৰ সাধুবোৰলৈ বৰকৈ মনত পৰে...

অসমীয়া প্ৰতিদিন ডিজিটেলে আয়োজন কৰিছে চিঠি লেখা এই প্ৰতিযোগিতা। ৰাজ্যৰ বিভিন্ন প্ৰান্তৰ পৰা প্ৰতিযোগিতাত বহু সংখ্যক প্ৰতিযোগীয়ে এই প্ৰতিযোগিতাত অংশ লৈছে। আজি এই প্ৰতিযোগিতাত জামুগুৰি উচ্চতৰ মাধ্যমিক বিদ্যালয়ৰ ছাত্ৰী স্নেহাপ্ৰিয়া বৰদলৈয়ে লিখা এই চিঠিখন আগবঢ়োৱা হৈছে...

পূজনীয়া,
আইতা, সৰ্বপ্ৰথমে মোৰ সেৱা গ্ৰহণ কৰিবা। বৰ্তমান মোৰ ভাল। আশা কৰোঁ তোমাকো ভগৱানে কুশলে ৰাখিছে লগতে ঘৰৰ সকলোকে মঙ্গলে ৰাখিছে। আইতা, মই তোমাক বহুদিন ধৰি লগ পোৱা নাই। সেয়ে তোমালৈ বহুত মনত পৰি আছে। 

গৰম বন্ধত তোমালোকৰ ঘৰলৈ যাম বুলি ভাবিছিলো। কিন্তু আমাৰ বিদ্যালয়ত গ্ৰীষ্মকালীন বন্ধৰ দিনকেইটাত বিনামূলীয়া পাঠদানৰ ব্যৱস্থা কৰা হ’ল। সেয়েহে তোমালোকৰ ঘৰলৈ যোৱা নহ’ল। আইতা তোমালৈ মোৰ মনত পৰে জানা, আগতে যে তুমি মোক ৰামায়ণ- মহাভাৰতৰ কথা, বুঢ়ী আইৰ সাধু, পঞ্চতন্ত্ৰৰ সাধু আৰু যে কত সাধু শুনাইছিলা মনত আছেনে ?

আকৌ সন্ধিয়া হ’লে চাকিৰ পোহৰত ধাৰিত বহি পঢ়িবলৈ ধৰোতে গৰমতে তুমি যে মোক তালপাতৰ বিচনীৰে বিছি থাকা, সকলোবোৰ কথা মোৰ মনত পৰি থাকে। আইতা আৰু এটা কথা ! বাৰিষা আহিলেই আগৰ সেই দিনবোৰলৈ মনত পৰে। মামাই যে পথাৰত খাল সিঁচি গৰৈ মাছ, কাৱৈ মাছ খালৈত ভৰাই লৈ আহে। তুমি পাতত দিয়া, খৰিকাত দিয়া আমি যে পইঁতা ভাতৰ লগত খাওঁ তাৰ লগত বেহুৱা থাকেই, কি যে মজা লাগে ন’ আইতা। তোমাৰ ওচৰলৈ যাবলৈ মন যায়, কিন্তু কৰিবা, পঢ়া- শুনাৰ দায়িত্ব বাঢ়িল। বাৰু এইবোৰ কথা বাদ দিয়া।

সদৌ শেষত নেদেখা জনৰ ওচৰত তুমি যাতে ভালে থাকা তাৰ বাবে প্ৰাৰ্থনা কৰিলোঁ। চিঠিৰ উত্তৰৰ আশাৰে...

ইতি,
 তোমাৰ মৰমৰ আইমানু
শ্ৰী স্নেহাপ্ৰিয়া বৰদলৈ
জামুগুৰি উচ্চতৰ মাধ্যমিক বিদ্যালয়
দশম শ্ৰেণী