ডেৰ মাহৰ অন্তত মেঘালয়ৰ পৰা উদ্ধাৰ মানকাচৰৰ অপহৃত নুৰ কালাম...

ডিজিটেল সংবাদ,মানকাচৰঃ অৱশেষত মেঘালয় আৰক্ষীয়ে উদ্ধাৰ কৰিলে মানকাচৰৰ নিৱাসী অপহৃত নুৰ কালামক। ১০ দিন পূৰ্বে হোৱাটছ এপযোগে নুৰ কালামক মানকাচৰ থানাৰ গাড়ী চালক আৰু ড্ৰাগছ মাফিয়া সহ ৫ দুৰ্বৃত্তই প্ৰহাৰ কৰাৰ এটা ভয়ংকৰ ভিডিঅ’ ভাইৰেল হৈছিল।

মানকাচৰৰ ঝাউডাঙা আৰাটগাঁৱৰ নুৰ কালাম খন্দকাৰ নামৰ যুৱক জন বিগত প্ৰায় ডেৰ মাহ ধৰি অপহৃত হৈ থকাৰ পাচত মেঘালয়ৰ ৰংৰাম থানাত তেওঁক উদ্ধাৰ কৰা হয়।

ঘটনা সন্দৰ্ভত জানিব পৰা মতে, প্ৰায় ডেৰ মাহ পূৰ্বে আশিক মণ্ডল নামৰ এজন ড্ৰাগছ মাফিয়াই নুৰক ঘৰৰ পৰা মাতি নি মেঘালয়ৰ ৰংৰাম এলেকাত উগ্ৰপন্থীৰ হাতত গতাই দিছিল।

ডেৰ মাহ ধৰি তেওঁক অজ্ঞাত স্থানত অপহৰণ কৰি ৰখাৰ পাছত কালি মুকলি কৰি দিয়াত যুৱকজন খোজকাঢ়ি ৰংৰাম থানাত উপস্থিত হয়। অপহৰণৰ পাছত ঘৰ এখনত যুৱকজনক বন্দী কৰি উচ্চস্বৰে হিন্দী গীত বজাই নিৰ্মম ভাৱে প্ৰহাৰ কৰাৰ এটা ভয়ংকৰ ভিডিঅ’ ভাইৰেল হৈছিল।

লোকজনৰ পত্নীয়ে মোবাইলত ভিডিঅ'টো লাভ কৰাৰ পাছত মানকাচৰ থানাত নিচাযুক্ত সামগ্ৰী সৰবৰাহকাৰী আশিক মণ্ডল ওৰফে লাৰজু আৰু মানকাচৰ থানাৰ গাড়ী চালক জিনাৰুল ইছলাম সহ মুঠ ৫ জনৰ বিৰুদ্ধে এজাহাৰ দাখিল কৰে যদিও বৰ্তমান ৫ অপহৰণকাৰীৰ দলটো পলাতক অৱস্থাত আছে।

অভিযুক্ত কেইজন ক্ৰমে আশিক মণ্ডল, জাকিৰুল ওৰফে ৰিকিত, বাবলু মিঞা, আলিম উদ্দীন আৰু মানকাচৰ থানাৰ গাড়ী চালক জিনাৰুল ইছলাম। আজি নুৰ কালামক হাটশিঙিমাৰী জিলা আদালতত হাজিৰ কৰাই ন্যায়াধীশৰ ওচৰত সাক্ষ্য গ্ৰহণ কৰা হ'ব।

Also Read: প্ৰয়াত শিশুৰাম হাজৰিকা সোঁৱৰণী ফুটবল প্ৰতিযোগিতা সম্পন্নঃ বিজয়ী ৰূপাইবৰী হান্তাৰ ক্লাব