মঙলদৈত ত্ৰিকোণ প্ৰেমৰ পৰিণতিঃ চিন্টুমনিয়ে হত্যা কৰিছিল প্ৰেমিকা কৃষ্ণামনিক...

ডিজিটেল সংবাদ,দৰংঃ প্ৰেমিক চিন্টুমনি নাথে হত্যা কৰিছিল প্ৰেমিকা কৃষ্ণামনি ডেকাক। আৰক্ষীৰ তদন্তত পোহৰলৈ আহিছে মঙলদৈৰ কৃষ্ণামনি হত্যাকাণ্ডৰ আচল তথ্য। আৰক্ষী সূত্ৰই প্ৰকাশ কৰা তথ্য অনুসৰি, চিন্টুমনি নাথেই হত্যা কৰিছিল মঙলদৈৰ ১৯ বছৰীয়া যুৱতী কৃষ্ণামনি ডেকাক। চিন্টুমনিয়ে মঙলদৈ নিকটৱৰ্তী পকাবাঙিপাৰাত থকা বায়েকৰ ঘৰত কোনো নথকাৰ সুযোগ লৈ হত্যা কৰিছিল কৃষ্ণামনিক।

মোবাইলত সমগ্ৰ ঘটনাৰ প্ৰায় ৮ টা ৰেকৰ্ডিং কৰিছিল চিন্টুমনি নাথে। আৰক্ষীয়ে ইতিমধ্যে উদ্ধাৰ কৰিছে মোবাইলটো। দৰঙৰ আৰক্ষী অধীক্ষকৰ নেতৃত্বত যোৱা তদন্তকাৰী দলে চিন্টুমনি নাথ আৰু কৃষ্ণামনি ডেকাৰ ফোনৰ ৰেকৰ্ডিং আৰু আন এগৰাকী যুৱকৰ ফোনৰ ৰেকৰ্ডিঙৰ ওপৰত ভিত্তি কৰি সকলো তথ্য পোহৰলৈ আনিবলৈ সক্ষম হৈছে।

দৰঙৰ আৰক্ষী অধীক্ষকৰ ভাস্য অনুসৰি চিন্টুমনি নাথে কৃষ্ণাক মটৰ চাইকেলেৰে মঙলদৈ পকাবাঙিপাৰাৰ বায়েকৰ ঘৰলৈ লৈ যায়। তাৰ পাছত দিনৰ ভাগতেই হত্যা কৰা বুলি সন্দেহ প্ৰকাশ কৰিছে আৰক্ষীয়ে। বৰ্তমানেও আৰক্ষীয়ে তদন্ত অব্যাহত ৰাখিছে।

উল্লেখযোগ্য যে চিন্টুমনি নাথে হত্যা কৰা স্থানত নাৰিকলি মন্দিৰৰ প্ৰসাদ পৰিত্যক্ত অৱস্থাত উদ্ধাৰ কৰাৰ উপৰিও আন আন কিছু আপত্তিজনক সামগ্ৰী উদ্ধাৰ কৰে আৰক্ষীয়ে। ইফালে চিন্টুমণি নাথৰ গাঁওখনত এক শোকাকুল পৰিৱেশৰ সৃষ্টি হৈছে। গাঁওবাসীয়ে আজিও মানি লোৱা নাই যে চিন্টুমনিয়ে হত্যা কৰিছিল নিজৰ ৪ বছৰীয়া প্ৰেমিকা কৃষ্ণামনি ডেকাক।

Also Read: কাজিৰঙাত ভূমিৰ অধিকাৰ বিচৰা থলুৱাৰ ওপৰত আৰক্ষীৰ বৰ্বৰ লাঠিচালনা...