কিবা এটা কৰক, নতুবা আত্মজাহ দিয়াৰ বাহিৰে বেলগ পথ নাইঃ দুৰ্ভগীয়া শিক্ষকৰ মুখ্যমন্ত্ৰীলৈ কাতৰ আহ্বান...

ডিজিটেল সংবাদ মঙলদৈঃ শুকুৰবাৰে দুপৰীয়া মঙলদৈৰ ফুটপাথত এক অভিনৱ প্ৰতিবাদত বহিল এজন লোক । নিজ পত্নী আৰু কণমানি সন্তানৰ সৈতে প্ৰতিবাদত বহিল মঙলদৈ দেওমৰনৈৰ কুলেন কলিতা নামৰ লোকজন। কেৱল প্ৰতিবাদেই নহয়, কুলেন কলিতাই সপৰিয়ালে আত্মজাহৰো ভাবুকি দিলে চৰকাৰক উদ্দেশ্যি ।

১৯৯৯ ত নিযুক্তি প্ৰাপ্ত দৰঙৰ প্ৰায় ২৫০ ৰো অধিক শিক্ষকে চাকৰি হেৰুৱাই দিকভ্ৰান্ত হৈ পৰিছে । তাৰে মাজেৰেই এজন কুলেন কলিতা। কুলেন কলিতাৰ লগতে প্ৰায় ২৫০জন শিক্ষকে ১২ টা বছৰে সুকলমে শিক্ষকতা কৰাৰ পিছত হঠাৎ চাকৰি হেৰুৱাইছিল ।

এতিয়া এইসকল শিক্ষকৰ পৰিয়ালৰ ঘৰ নচলা অৱস্থা ।পৰিয়ালক পোহপাল দিবলৈ সামৰ্থ হেৰুৱাই এতিয়া মঙলদৈ ৰাজহ চক্ৰ বিষয়াৰ কাৰ্য্যালয়ৰ সন্মুখত পৰিয়ালৰ সৈতে প্ৰতিবাদত বহিল কুলেন কলিতা ।

এবাৰ হ'লেও মুখ্যমন্ত্ৰী হিমন্ত বিশ্ব শৰ্মাক সাক্ষাৎ কৰিব বিচাৰিছে বঞ্চিত শিক্ষক গৰাকীয়ে ।লগতে তেওঁ আশাবাদী মুখ্যমন্ত্ৰীয়ে তেওঁৰ আহ্বানৰ প্ৰতি সঁহাৰি জনাব ।অন্যথা আত্মহত্যাৰ দৰে পথ বাছি ল'ব সপৰিয়ালে ।