সকলো অভিলেখ ভংগঃ মনোহাৰী গ'ল্ড টি প্ৰতি কেজি বিক্ৰী হ'ল ১ লাখ ১৫ হাজাৰ টকাত...

ডিজিটেল ডেস্কঃ পূৰ্বৰ সকলো অভিলেখ ভংগ কৰি অসমৰ মনোহাৰী গল্ড টি প্ৰতি কিলোগ্ৰাম বিক্ৰী হ'ল ১ লাখ ১৫ হাজাৰ টকাত। হায়দৰাবাদৰ ক্লায়েণ্ট কেফে নিলোফাৰ টি ইনটেকৰ নিলাম প'ৰ্টেলৰ জৰিয়তে হোৱা নিলামত এই মূল্য লাভ কৰিছে ডিব্ৰুগড়ৰ মনোহাৰী গ'ল্ড টিয়ে।

গুৱাহাটী চাহ নিলাম কেন্দ্ৰত ২০১৮ ৰ পৰা ২০২১ লৈ চাৰি বছৰে ধাৰাবাহিক ভাৱে মনোহাৰী গ'ল্ড টি ১ লাখ টকাত বিক্ৰী হৈছিল। উল্লেখ্য যে, গুৱাহাটী চাহ নিলাম কেন্দ্ৰত ভাৰতীয় টি ব'ৰ্ডৰ কেপ ৫০ টকাত সীমাবদ্ধ হোৱাৰ বাবেই সৰ্বোচ্চ ১ লাখ টকাত বিক্ৰী কৰিবলগীয়া হৈছিল মনোহাৰী গ'ল্ড টি।

এইবাৰ ব্যক্তিগত নিলামত সেই সীমাবদ্ধতা নথকা হেতু পূৰ্বৰ অভিলেখ ভংগ কৰি প্ৰতি কিলোগ্ৰাম চাহ ১ লাখ ১৫ হাজাৰ টকাত বিক্ৰী হয়। মনোহাৰী গল্ড টি বিশ্বৰে এক বিৰল জাতৰ চাহ।

এই চাহ চেকেণ্ড ফ্লাছৰ সময়ত, বহু উন্নত ক্লন পি-১২৬ ৰ সহায়ত তৈয়াৰ কৰা হয়।ইয়াৰ বাবে পুৱা ৪ বজাৰ পৰা ৬ বজাৰ ভিতৰতেই পাত তুলি লোৱা হয়। ফলত এই চাহৰ সুকীয়া সুগন্ধী আৰু সোৱাদ সূৰ্যৰ তাপে পৰিৱৰ্তন কৰিব নোৱাৰে। মনোহাৰী গল্ড টিৰ বিশ্বৰ ভিতৰতে আটাইতকৈ স্বাস্থ্যকৰ পানীয় বুলিও পৰিচিয় আছে।

ক্লিক কৰি পঢ়কঃ স্বাস্থ্য বিভাগৰ উদ্যোগত বিশেষ প্ৰতিষেধক টিকাকৰণ সপ্তাহ অভিযানৰ শুভাৰম্ভ...