চিলাপথাৰ নগৰত ভয়ংকৰ অগ্নিকাণ্ড : বহু পৰিমাণৰ সম্পত্তি ক্ষয়-ক্ষতি...

ডিজিটেল সংবাদ, চিলাপথাৰ : চিলাপথাৰ লিকাবালি পথত দেওবাৰে পুৱতি নিশা এক ভয়ংকৰ অগ্নিকাণ্ডৰ ঘটনা সংঘটিত হয়। জানিব পৰা মতে এখন টায়াৰৰ দোকানৰ দিশৰ পৰা সূত্ৰপাত হয় অগ্নিকাণ্ডৰ ঘটনা।

জুইৰ ক'লা ধোৱাই নিমিষতে আৱৰি ধৰে চিলাপথাৰৰ আকাশ। ৰাইজৰ মাজত সৃষ্টি হয় আতংকৰ। মুহূৰ্ত্তৰ ভিতৰতে টায়াৰৰ দোকান, ফলৰ গুদামৰ লগতে ভস্মীভূত হয় কেইবাখনো দোকান।

কাৰ্যতঃ ছাঁইত পৰিণত হয় কোটি টকাৰ বয় বস্তু। অগ্নিনিৰ্বাপক বাহিনীৰ কেইবাখনো বাহনে উদ্ধাৰ অভিযান চলাই যদিও কোনো সামগ্ৰী বচাবলৈ সক্ষম নহ'ল বুলি জানিব পৰা গৈছে।

অৱশ্যে এই অগ্নিকাণ্ডত দুটুকুৰামান আধা পোৰা টিনপাট ৰক্ষা পৰে । উল্লেখ্য যে অলপতে ধেমাজিৰ মাছখোৱাতো সংঘটিত হৈছিল অনুৰূপ ঘটনা।

ৰাসোৎসৱক লৈ সৰ্বত্ৰ আনন্দ উল্লাস অব্যাহত থকাৰ সময়তে এই ঘটনাই ৰাইজৰ মাজত তীব্ৰ প্ৰতিক্ৰিয়াৰ সৃষ্টি কৰিছে অঞ্চলটোত।